Shillong, Risaw 08: Ka KSU South West Khasi Hills District hapoh ka jingialam jong u samla Dusterwell K. Lyngdoh haka jingsynran lang jong ki nongialam ka KSU Umdohlun Circle bad KSU Mawkyrwat Circle ki la leit ban iakynduh ia u Chief Engineer ( Distribution) jong ka Meghalaya Power Distribution Corporation Ltd ha Lumjingshai, Shillong.
Ka jingleit iakynduh jong ka seng ka long ba hadien ba ki paitbah nongshong shnong jong ki hynniew tylli ki shnong hapoh ka South West Khasi Hills District ki la mad iaki jingeh naka daw jongka jingbymdon bording shuh ba sniew nohki transformers mynta la Katto Katne bnai.
Kine ki shnong ki dei ka shnong Nongmluh, Mawphansaw, Pyndensynnia, Mawthungmlang, Phlangmawprah bad Ryngkhiat haka Thain Phlangdiloin ba hap hapoh ka Ranikor Civil Sub Division bad ka shnong Kensimphlang kaba hap hapoh jongka Mawkyrwat C&RD Block.
Napdeng kitei ki shnong, ka shnong Mawphansaw bad Nongmluh lei ki dei ki shnong kiba la duh bording mynta la jan dap snem. Hooid Ki bor ba dei peit haki bnai ba lah dep ki la pyrshang ban wan buh daki transformers hynrei namar ki dei ki ba rim kumta Ki la sniew biang hadien katto katne sngi ba la wan buh iaki.
Ka shnong Kensimphlang ruh mynta la Katto Katne bnai kam don bording shuh bad namar haba la wanbuh daki u transformer ba rim kumta la sniew noh hadien Katto Katne sngi. Ha shnong Phlangmawprah, Mawthungmlang, Ryngkhiat bad Pyndensynnia pat ka bording ka la duh noh mynta la shibnai tam.
Naka liang ka seng ka la kyntu ia u Chief Engineer ba u dei ban bujli ne ai noh daki transformers kiba dang thymmai khnang ba kan nym long ka jingpynthud iaki paitbah jong kine ki Thain. Ka seng ha kane ka jingiakynduh ka la kren ruh halor ka mat ban ai bording noh ha shnong Mawlar, South West Khasi Hills District namar watla kane ka dong kaba hap hapoh ka shnong Kensimphlang ka don 13 ing hynrei haduh mynta Kam pat don ilektrik haduh mynta.
Ka seng ka la Dawa bad kyntu ruh sha u Chief Engineer ba khnang ba kan nym don ka jingthud ba man ka por jong ka light ha ka thain Myriem, Rangblang, Umdohlun bad Phlangdiloin ngi la pynsngew sha u ba ka la donkam ban buh noh daka Power Station ha shnong Mawsaw ne ha Umdohlun.
Ka seng ha kane ka sngi ka la kren ruh ban pynsted iaka jingpyntreikam iaka scheme Pradhan Mantri Sahaj Bijli Har Ghar Yojana ne ka“Saubhagya”scheme kaba dei ka scheme ban leh connection bording khlem jingsiew iaki longing ba hap hapoh ka Socio Economic and Caste Census 2011 data ha ki jaka kyndong jongka South West Khasi Hills khnang ba kan long ka jingmyntoi ia u duk u suk jongka District.
Naka liang jong u Chief Engineer u la Kular ban shimkhia halor kine ki mat ba ka seng ka la wanrah bad ngi khmih lynti ruh ba yn lah ban leh eiei noh kham kloi na ka bynta ka jingmyntoi jong ki kup shiliang sem shiliang bad ki paitbah nongshong shnong ka South West Khasi Hills District, la ong u samla Dusterwell K. Lyngdoh, Organising Secretary KSU South West Khasi Hills District.
