Sngew heh mynsiem u MLA ba kham kiew ka pule puthi ha ka thaiñ Mawkynrew

Shillong, Nailur 30: U Bah Banteidor Lyngdoh, MLA ka Mawkynrew Constituency uba dei ruh u Myntri Sorkar Jylla ba dei peit ia ka tnad Agriculture bad Sports, u la la pynpaw ka jingsngewsarong bad jingsngew heh mynsiem shi katdei eh namar ka jingioh jingkheiñ ba ka jingdon kiba la nang ban thoh ban pule ka la kiew sted bha ha ka thaiñ.

Ia kane u la pynpaw ha ka jingkren kum u Kongsan ha ka jingialang pynkup burom- ha School Hall ka Good Shepherd HS School, Jongksha- kaba la tip kum ka Mawkynrew Constituency Academic Excellence Award, 2020 ia ki samla ka Constituency kiba la pass bha bad poi ha ka 1st Division jong ka eksam SSLC bad HSSLC ba dang shu pyllait result shen ha ki bnai kiba la dep.

“Tang mynta ka sngi kiba la ïoh khusnam (da ka certificate bad song pisa) ki la jan kot ia ka 100 ngut bad kane ka pyni ia ka jingkiew ka thaiñ ha ka liang ka pule puthi bad nga da sngew sarong eh na ka bynta kane”, u la ong.

“Ka pyni ba ki nongshong shnong ka thaiñ ki angnud ia ka jingnang jingstad”, da kaba ai khublei ia ki ia ki kmie ki kpa, ki nonghikai bad baroh kiba ia don bynta ban kyntiew ia ka pule puthi.

Da kaba pynpaw ba ka khlam COVID-19 ka la long ka dieng pynkiang mynta u snem ha ka pule puthi, u la ong, “Ngim dei ban duh jingkyrmen bad ngi ngeit ha kawei ka sngi kane ka khlam kan sa jah noh bad ngin sa lah ban long kumba ju long shwa ka jingwan kane ka jingpang”.

U la kyntu ia ki samla pule ym tang kiba la ïoh pdiang khusnam hynrei ia kiwei pat ba kin long kiba don ka jingangnud bad ka thong. “Nga kyntu ia phi ba phin long ruh kiba minot bad im sngi ban ïoh ia ka thong bad phim dei ban kynran dien lada phi shah tynjuh ha ki jingeh namar ki jingeh ki dei ki mawkyndon ban poi sha kliar ka nam bad ka burom da ka jingsngew rit”, u la ong.

Ha kawei pat ka liang u la kyntu ia ki ba kin long kiba skhem jingmut ban lait na kino kino ki jingshah ialam bakla kiba tang shu bakla shisien kin long ka jingbabe shi lynter jingim.

“Nga ban jur ba kin don ia jingïatreilang, ia phylliew jingmut bad ki kmie ki kpa bad ki nonghikai khnang ban tei ia ka lawei kaba skhem kaba kum ki samla ba stad ba shemphang kin tei ia ka imlang sahlang bad ka Jaidbynriew kaba skhem”, u la ong.

U Bah Roni Wahlang, BDO ka Mawryngkneng C&RD Block u la ban jur ba ka long kaei kaei kaba sngewsih ba ki samla ki kyrkieh palat ban shim ia ka kyrdan longkmie longkpa khamtam haba ym biang ka kam ka jam.

“Lada ym skhem ka nongrim ka eh ban tei ia ka lawei kumta pyndonkam bha ia ka por ha ki jingpule kum ki samla ba don ka jingkitkhlieh na ka bynta ki kmie ki kpa, ka ïing, ka shnong ka thaw bad ka thaiñ hi baroh kawei”, u la ong.

Ha kane ka sngi la sakhi ruh ia ki jingrwai jingshad na ki khynnah kiba la wan na kylleng ki shnong ki thaw ka Constituency ha ka jingiadonlang ki kmie ki kpa lem ki nonghikai.

Kiwei kiba la ai jingkren ha kane ka sngi ki kynthup ia u Bah Olet Kharsahnoh, Sordar Shnong Jongksha, Bah A Rynjah, President ka PDF Mawkynrew, Fr George Jacob, Parish Priest bad Headmaster ka Good Shepherd HS School lem bad kiwei kiwei pat.

 

 

What Next?

Recent Articles

Leave a Reply

Submit Comment

*