Shillong, Lber 18: Lalnunpuia, na Seling kumba 40 km na ka nongbah Aizawl uba long u nongialehkai judoka ba paw khmat jong ka Mizoram u don mynta ha Shillong bad trei ruh ha Assam regimental Centre (ARC) Happy Valley Shillong.
U Lalnunpuia u la ju ai shim bynta ha kibabun ki jingialehkai Judo championship ha India bad katto katne shabar India ruh. U la ioh takma ksiar ha ka jingialehkai Junior National Judo Championship 2011 ha Bangalore ha ka weight kaba hapoh 55 kilo bad kumjuh u la wanrah takma rnong ia ka Ri India ha Cuba ha u snem 2011.
Ha ka dur phi lah ban iohi ia U Lalnunpuia (track suit rong lieh bad jyrngam) ryngkat bad Bah Larry P Warjri Vice President Judo Federation of India bad President Meghalaya Judo Association. Shen U Lalnunpuia un sa ia shim bynta ha katto katne ki Free Demo cum Coaching Camp in Judo ia kaba yn pynlong ha ki katto katne ki distrik ka jylla Meghalaya kum shibynta ban pynshlur ia ki khynnah samla ban wan sha kine ki Judo Camp ba la pynlong da ka Directorate of Sports & Youth Affairs ryngkat ka Meghalaya Judo Association lyngba ki District Sports Ophisar.
U Samla Field Mission Kharsati uba trei ha ARC Happy Valley bad uba la wanrah takma rnong ha Iran ha ka International Young Boxing Championship 2010 bad takma ksiar ha ka Indo – Sri Lanka Boxing Exchange 2013 ha Bangalore. ka sports ka long kawei pat ka lad ba lah ban iohkam khamtam ha ki kam pyrton shipai. Dang shen 3 ngut ki nongialehkai judo na ka jylla ki la ioh kam pulit.(SP News)
