Shillong, Naitung 16: U Myntri rangbah ka jylla u Cornad K Sangma mynta ka sngi u la ong ba la shah ia ki briew kiba na sha bar ba kin wan sha Meghalaya tang ia kito kiba la dep ban ai Tika baroh arsien.
Haba ia dei bad ka jingteh la kam ia ka jingsaphriang ka khlam COVID-19 ha kane ka ka sorkar kala bthah ia ki Deputy Commissioner ba kin khot ia kren ia kito kiba pyniaid ia ki kam jngohkai pyrthei ban ia peit la, la lah ne em ban sdang ban plie ia ki jaka jngohkai ha kane ka jylla.
La bthah ia ki DC ba kin khot ia ka jingialang bad ki nongialam niam ban ia mir jingmut kumban leh ia kaba ia dei bad ka jingpyniathoh shong kumrim, namar kumba ka long mynta la khang ban pynlong ia ki jingpyniathoh shong kumrim.
Ka jingbteng ia kane ka jingkhang ha ka jingialeit ia wan na kawei District sha kawei pat hapoh ka jylla kala buh ia ki ba bun ha ka jingeh ha kaba ia dei bad kane ruh la bthah ia ki DC ka kin ai ia ka kaiphot sha ka sorkar.
Haba ia dei bad ka jingpynlait ia ki kali kamai, ka sorkar kala bthah ia ki DC ba kin pynlait haduh 50% ia ki kali ha ki nongkyndong bad ha Shillong la bthah ba pynlait noh ia ki kali kamai 30%. Ka sorkar kala buh ia thong ba lada lah ban ai Tika kumba 25000 ngut ha ka shisngi bad lada lah kumta ha u Nailar la lah ban pynpoi sha ka thong.
