Shillong, Jymmang 15: Ka Deputy Commissioner jong ka East Khasi Hills District mynta ka sngi kala pynbna ba kat kum ka jingbthah jong ka Sorkar lyngba ka Hukum No.POL.75/2020/PtI/98 Dated Shillong, 15th Jymmang, la pynjari ia ka Korphiew naduh ka 17 tarik por 5 baje mynstep haduh ka 24 tarik por 5 baje mynstep Jymmang 2021.
Bad ia ka Hukum No.C&S.3/2009/Pt.III/104 Dated Shillong, 15th Jymmang, 2021 bad khnang ba ki paidbah nongshong shnong kin ioh ban thied ban pet ia ki jingdonkam ba man la ka sngi ha ka por ban pynjari ia ka
kurphiw 17 haduh 24 tarik, Jymmang 2021 hapoh East Khasi Hills District, tang ki dukan die marbam mardih bad ia ki tiar ba donkam eh kiba la jingpynbeit da ki Incident
Commander jong man la ki Zone kiba don hapoh Sor Shillong.
Ki jaka ba marjan, kin lah ban plie naduh sngi nyngkong haduh sngi thohdieng, naduh ka por 9 baje mynstep haduh 5 baje janmiet, , khnang ba ki paidbah nongshong shnong kin lah ban thied ban pet ia ki mar ba donkam eh. Baroh ki dukan kin khang ha ka 22 bad 23 tarik u Jymmang, 2021 Sngi Saitjain bad Sngi U Blei.
Baroh ki shnong ki dong ki la jied ia ki dukan ha la ki jong ki jong ki shnong bad dong, bad ki bor shnong bad CCMT kin pyntikna ba ki paidbah nongshong shnong kim dei ban mih shabar na la ki jong ki shnong ki dong na ka bynta ban thied ia ki mar ba donkam ban lait na ka jingkhapngiah ne jingsaphriang shuhshuh jong u khniang jingpang.
Na ka bynta ki shnong kiba don ha ki thain nongkyndong jong ka District, ia kane kajuh ka jingpynbeit yn sa pyntreikam da ki Sub-Divisional Officer (Civil)/Block Development Officer bad Incident Commander ha ryngkat ka jingiatreilang bad ki Rangbah Shnong bad ki CCMT.
Ki Rangbah Shnong, CCMT bad ki kynhun ba peit ia ka bha ka miat hapoh shnong poh thaw, kin pynbeit ia ka jingtreikam jong ki dukan ha la ki jong ki jong ki shnong ki dong bad ruh ban pyntikna ba ki paidbah nongshong shnong kin bud ryntih ia ki jingbthah ba la pynmih da ka tnat ka Koit ka Khiah.
Ki paidbah ki dei ban bud pyrkhing ia kine ki kyndon harum haba ki leit thied leit pet, Lashah tang iwei i dkhot na kawei ka longiing ban mih ban leit thied jingthied.
Ban deng barabor ia ki mask, Ban pyniajngai iwei na iwei pat ym duna ia ka 1 mitar, Ban ym ia lum bun briew tang ha kawei ka jaka bad dukan bad ruh ban ym pynjlan por palat hapoh dukan.
La kyntu ban iatrei lang bad ki jingpyniaid jong ki Rangbah Shnong bad CCMT bad jong ki Incident Commander. Lada lap ia kino kino ki ba mih khlem kano kano ka daw kaba biang, yn pynshitom kat kum ka ain. Ia ki mar bam mar dih ym don jingduna eiei bad kane ka Ophis ka la peitngor bha halor kane ka bynta.
Ki dukan ba die ia ki mar bam mar dih kin bteng ban plie kumba la ju pynbeit na ka por sha ka por, te ki paidbah kim dei ban tieng ne mih shisien mih ha ki por ba plie, la pynbna ka DC ka East Khasi Hills District.
