Shillong, Risaw 26: U Myntri Rangbah ka jylla u Conrad K Sangma ha ka sngi u blei u la buh ia u mawnongrim ban tei ia ka “Captain W. A. Sangma Memorial College” ha Baghmara, kaba dei lyngkhuh sngi iap ba 30 snem jong u myntri rangbah ba nyngkong ka jylla ha ka jingiadon lang u myntri ba dei peit ia ka tnad pule u bah Lahkmen Rymbui.
Haba kren ha kane ka sngi u myntri rangbah ka jylla u la ong ba kane ka college ka dang sah kum juh kaba u la wan jngoh khat ar snem mynshuwa kata ha u snem 2008, ia ka la shimti da ka sorkar hynrei kane ka college kam don jingkylla ei ei haba ia dei bad ka iing jong ka college.
Khlem da kynnoh ia ki sorkar kiba la leit noh, u la ong ba ka long kaei kaei kaba la shu pynslem ban shim por haduh 12 snem ban mang pisa kaba tang T.12 klur la buh jingkylli u Conrad myntri rangbah, hynrei mynta labuh ia u mawnongrim bad hapoh ar snem kane ka iing kaba thymmai kan sa ai jingmyntoi ia ki samla pule jong ka District.
U Myntri Rangbah ka jylla u la ai ka jingiaroh ia u myntri ba dei peit ia ka tnad pule puthi ha kaba u la shim ia ka rai ban mang pisa noh ban tei ia kane ka College, la ong ba u bah Lahkmen u dei u myntri u ba ong beit ia kaba iong kan dei kaba iong bad ia kaba lieh kan long beit kaba lieh kane ka kren shai ba u don ka jingkit khlieh ia ka lawei jong ki khun samla ka jylla.
Ha kane ka jingialang paidbah u myntri rangbah u la ong haba u myntri ka tnad pule u la wantah ia kane ka jingtyrwa ban mang pisa ban tei ia ka college , Capt Sangma College ha Baghmara ka shim por tang ar minit ban shim ia ka rai, ha ka por ba shim ia ka rai ka long lai tylli ki College, ha Williamnagar bad kawei ka Sohra bad la mang pisa ia ki.
La ong ba ka jingiohi jngai jong u Dr Donkupar Ror bad u P.A Sangma kiba la bam kwai ha dwar u blei la lah ban pynurlong mynta ka sngi bad ka jingdawa na u P A Sangma ba dei ban shim noh ka sorkar ia kane ka College ka dei ha u snem 2008 ha kaba por ba u Dr Donkupar u long myntri rangbah ka jylla.
La ong ba ia kitei ki lai tylli ki College la sdang ha u snem 2008 bad la pynurlong ha u snem 2020, la ong ba ka jingphohsniew jong u Captain W.A Sangma, Lodhsing Sangma kan nym urlong lada ki khynnah pule jong kane ka college kim lah ban shah jied ban ia khun ia ki eksam IAS, IIT, IIM bad kiwei ki eksamin bad kane ka college kam dei ban long tang ka iing hynrei kan pynlong ia ki khun samla ki briew kiba bha.
Ha kane ka sngi u myntri rangbah u la kren ia ka jinglong jingman ka pule puthi ha ka Garo Hills ha kaba u la ong ba ki Higher Secondary Schools bad ki Colleges ha South Garo Hills katkum ka jingdon ki paidbah nongshong shnong, baroh kawei ka South Garo Hills ki jaka pule ha ka Higher Secondary School ka long tang 2380 ngut ki lah ban ngiam, ha College tang 610 katba ki samla ba dang dei ban pule ki ki don haduh 15000 ngut.
La ong ba ki samla jong ka South Garo Hills kiba pule mynta ki long tang 20% bad lada ka sorkar kam lah ban leh ei ei ka jingpule ka dang hiar shuh shuh. La ong ba ka “Meghalaya Edication Policy” ka dei ka bynta ba ha khmat eh jong ka sorkar ban ailat ia ki khun samla ba kin lah ban kiew bad ki khun samla jong ka jylla kim saindur ia la lawei jong ka jylla, la ong ba ha kine ki san bnai ban wan ka sorkar kan phai khmat sha ki skul primary bad elementary.
