Shillong, Naiwieng 16: Lai tylli ki seng bhalang kynthup ia ka CoRP-EZ, FKJGP-EN bad ka RNYF ki la thaw ia ka Joint Action Committee Against Corruption (JACAC) ha ka jingialang ha Bhoirymbong hynnin ka sngi Ba-ar ban pyrshah ia ki kam bam sap bad ka rukom pyntrei bym hok ia ki skim sorkar bapher bapher kaba la ktah ia ka roi ka par bad ka ioh ka kot ki paidbah nongshong shnong ka Umroi constituency bad ka thian hi baroh kawei.
La iohi ia ka jingiai khie rasong ki kam bam sap ha ka rukom pyniaid bad pyntrei kam bym dei ia ki shkim sorkar ka pynlong ia ki duk ki rangli ban shah leh bein namar ba kim nud ban ong ne pynpaw ia ki nongialam shnong ne ki rangbah kiba iadei bad u MLA jong ka Umroi Constituency.Kumta kitei ki lai seng ki la thaw ia ka JACAC ban bud dien kyrpang ia ki rukom pyntreikam ia ki skim sorkar bapher bapher.
Ha katei ka jingialang la ioh ka jingkren da ki rangbah, ki samla kiba la pynpaw ia ka jing sngewkhia halor ka jingsah dien ka constituency khamtam ki paidbah ba duk ba kyrduh kiba im jakpoh da ka kam bylla, bad kane baroh ka wan jia tang na ka daw ba u MLA ka thain um pyntrei kam hok ia ki scheme kiba la mang kyrpang da ka sorkar lyngba ki nongmihkhmat (MLA) bad kumjuh ia ki skhim lyngba ka tnad PWD bad kiwei kiwei .
La lap ba bun ki skim ym shem la pyniaid hok katkum kaba la mang da ka sorkar sha ki paidbah hynrei la pyntrei da ka jingsngew paralok. Kane ka jingleh ka dei kawei na ki kam bamsap ia ki paidbah kaba ktah ia ki duk ki suk ban shah ban bein shuh shuh ha ki heh spah.
Kumta ka JACAC kam banse ban mih sha khmat bad kyrpad ia ki paidbah ban ai ka jingiatrei lang khnang ba yn lah ban rat dyngkhong ia ki kam bamsap hapoh ka constituency.
Ha kane ka sngi la jied ia ki nongkitkam ka JACAC ba kynthup ia u Bah Garland Kharsyntiew kum u President, bah Basal Lyngdoh Vice President, bah Rodrick R Syiemiong Secretary, bah Jame Rober Kharkrang Organizing Secretary, Bah Bishar Dhar bad H Jalong kum ki Adviser bad ki dkhot kin long baroh ki Executive member jong ki lai seng.
