Shillong, Rymphang 28: Ka seng B
JP ka la sdang ia ka prokram ban lum ia ki jingaijingmut na ki paidbah ka jylla ia kaba yn sa kynthup ha ki mat ka treikam jong ka seng na ka bynta ka MP elekshon ban sa wan. Ia kane ka prokram la sdang hynnin ka sngi ha kaba u president ka seng u Rikman G Momin u la thep nyngkong eh ia ka jingaijingmut jong u.
Ka party ka iawer ia ki nongshongshnong ka jylla ba kin phah ia ki jingthoh jongki sha ka NaMO app ne da kaba shu ai miscall ha u nombor 909090 2024. Ki seng trei mon sngewbha bapher bapher ruh ki lah ban phah ia ki jingaijingmut jongki da kaba ai da ka jingthoh sha ka office jong ka seng ha ki district ne ha ka ophis jong ka seng ha ka jylla.
Ha ka jingkren jong u presiden,t u la banjur ba ka BJP ka ngeit ba ha ka synshar paidbah ki nongshongshnong ki dei ban mih shakhmat ban pynsgew ia ki jingsngew jong ki bad khamtam ia ki jingangnud bad ka BJP kum ka seng sain hima sima ka pdiang ia kita baroh bad dei tang ka BJP ha baroh kawei ka ri kaba iaid ryngkat lang bad ki paidbah ha kaban shna ia ki mat treikam jong ka.
Lymba kane ka prokram ka party ka kwah ban trei da kaba ioh ia ka jingmynjur na ki paidbah. Bun bah ki jingangnud jong ka jylla bad ka BJP ka ailad ia iwei pa iwei i nongshongshnong ban phylliew.
Ka seng ka la buh jingthmu ban pynpoi haduh 5000 tylli ki jingthoh halor ki mat bapher bapher kum ka jingithuh ia ki ktien ka jylla ha ka eight schedule, ka jingseng ia ki medical college, ka jingpynkiew ia ki lad ai jingsumar, ka jingpynmih kam mih jam na ka bynta ki khun samla bad kumta ter ter.
