Shillong, Jymmang 31: U bah Roy Kupar Synrem Secretary jong ka Shong Shella u la phah da ka jingthoh sha u Assistant Executive Engineer MeECL, Sohra (Distribution) Sub-Division,Sohra bad kum juh sha u MLA jong ka Shella u bah Balajied Kupar Synrem.
Ha ka shithi kaba la thoh la ong ba kum ka dorbar shnong Shella ki kwah ban pynpaw ia ki jingeh ha kaba ia dei bad ka bill light kaba ki paidbah ka thain ki ia kynduh jingeh baroh kawei, kata ka long ka jinglip light tang la dei ka por lyiur man la u snem bad ki hap ban shong dum da ki bun bun sngi, kane ka jingeh ka long mynta u snem ruh kum juh.
Na ka liang jong ka shnong ka kyntu ia u MLA bad kum juh ia ka MeECL ba kin wad ki lat ki lynti ban weng ia kane ka jingeh khamtam eh hapoh ka shnong Shella kaba ia khap bad ka Bangladesh ha kaba ki riew sniew ki wan ha ka por mynmiet.
Ha ka shithi la kdew ba ka MeECL ka dei ban thaw lat kumno ban pyntrei kam noh ia ka line bording kaba dei ban iaid lyngba ka shnong Mustoh kaba long markhap bad ka shnong Shella bad la ai ka jingkular ba ka shnong Shella kan ia treilang bad ka ophis.
Ha ka juh ka por la kdew ruh ia ki jingeh ha kaba ia dei bad ka bill light ha kaba ka jingkiew kala long palat pud kane leh se ka dei na ka jingleh thulmur jong ki briew ba dei ban shna ia ka bill light bad kane kala wan rah ia ka jingeh ia kito kiba hap ban siew ia ka bai light. La kyntu ruh ban phah ia u JE Engineer ban peit ioh don ka jingbakla.
Na ka liang jong ka shnong kala kyntu ia ka ophis jong u Assistant Engineer kaba don ha Sohra ba kan ailad ia ki briew ba kin siew lai saw sniew ia ka bai light khlem kano kano ka kuna namar ki paidbah ki ia kynduh jingeh ha kane ka lock down.
Haba ia dei bad u Transformer hapoh ka kher Sohlap ka dong kala dep ban pynbeit ia ka jaka hynrei haduh mynta kam pat urlong. Na ka liang jong ka shnong ka kyntu ia ka MeECL ba kan peit lem ia kitei ki jingeh jong ka shnong Shella.
