Shillong, Jymmang 7: Ka kynhun ki dorbar shmong kiba don sawdong ka wah Umngot kina don laiphew khyndai tylli shnong kila thaw ia ka ‘Joint Action Committee Against Umngot Hydro Electric Project’ kila phah da ka jingthoh sha u myntri rangbah ka jylla u Conrad K Sangma ban dawa ban sangeh shuwa ia ka jingtei ia ka dam ha wah Umngot.
Ha ka shithi kaba kila thoh mynta ka sngi kila dawa ban pynkutnoh shi syndon ban pyntrei ia ka Umngot Hydro Electrik Project bad buh Moratorium.
Ha ka dorkhas la ong ba ki nongshong shnong jong ki shnong kiba don shi lynter ka Wah Umngot bad ki nongshong shnong ka Jylla Meghalaya ki kwah ban pynpaw ka jingpyrshah kaba jur halor ka jingthmu ka Sorkar Jylla ban den ia wah Umngot na ka bynta ban pynmih bording elektrik.
Kum ki nongshong shnong kiba don shaneng ki jaka ban tei ia ka dam, kiba im na ki jaka rep ba don ha ka area ka wah umngot naduh myndai mynthai haduh mynta, bad ngi iai kyrmen ruh ba in im pateng la pateng na kane ka jaka, bad Kumjuh ruh ki shnong kiba don sharum na kane ka dam kiba ia im na ka jingpyniaid ia ki kam jngoh pyrthei lyngba ka wah Umngot.
Kum ki paidbah ki ia ieng ha kajuh ka nongrim ban pyrshah jur ha kaba iadei bad kane ka project, bad ki dawa ba ka sorkar ka dei ban pynkut noh shisyndon ia kane ka project bad ki ieng ha ka juh ka nongrim ba kin nym pdiangshuh ia kano kano ka jingpynshai.
Ka JAC kala thoh ba Kin ym shah shuh iano iano na ka liang ka sorkar ne company ban wan jurip ne survey ia kane ka wah na ka bynta ban thmu ban pynmih ia ka bording electric. Ka JAC kala phah ia Kane ka jingthoh ban pyrshah sha ki tnad ophis sorkar kynthup ia ka tnat Meghalaya State Pollution Control Board kaba dei ka tnat kaba dei khmih bad pynїaid ia ka jingїalang ujor paidbah.
Ka JAC ka kwah ban pyntip ba ka jingpyrshang jong ka Meghalaya State Pollution Board lang bad ka MeECL ban pynlong ia ka jingїalang ujor paidbah ka long kaba be aiῆ bad ka la pynkheiῆ ruh ia ki kyndon bad jingpynmih hukum jong ka EIA. Ym dei tang katta, ki kwah ruh ban pynpaw da kaba shai kdar hangne ba ki nongshong shnong kim kwah ban їashim bynta ha kino kino ki jingїalang ujor paidbah namar ba ngim kwah satia ba ka Sorkar ne kano kano ka bor ne Company ba kan tei ia ka Dam bad den ia ka wah Umngot.
Ka jingpyrshah ia ka dam ka long ba kan wanrah ka jingjulor bad jingduh noh ki jaka rep ba seisoh ha shi lynter ka Wah Umngot.
Ka jingduh noh ki kam ki jam jngoh kai pyrthei kiba dang iai kiew mynta hadien ki jingpyrshang bad jingtrei shitom da ki phew phew snem.
Ki jingma ba ap shrip na ka Pollution, ka jingtwa, ka jingslei um kiba shait long na ki daw jong ka jingden ia ki wah Ka jingma ba shyrkhei kaba ap ia ngi na kane ka dam khamtam na ka daw ba ka jylla jong ngi ka don ha ka seismic zone 5.
Ka jingduh noh ia ki khlaw ki btap, ki siej ki dieng shna iing shna sem, ki mrad bad ki dohkha dohum bapher bapher. Ka jingduh noh ia ki jhur ki soh, ki dawai kynbat kiba long ki lad jingai jingsumar bad jing kamai ha Ri Khasi Jaintia, bad ka jingduh noh jong ki spah mariang.
Ka wah Umngot ka dei ka Bei bad ka Kmie jong ngi kaba bsa ia ngi naduh ki por kulong kumah bad ym don spah, ym don khyndew, bad ym don da kiwei pat ki lad ne ki lynti kiba lah ban їabujli bad ka wah Umngot.
Kumta ngim lah ban їapeiῆ bad ki sbai rupa kiba ka Sorkar Jylla ka tyrwa ia ngi bad ka tyngka pliah kan ym lah ban pyndap ne bsa ia ngi kumba bsa ka wah Umngot ia ka jingim jong ngi na ka pateng sha ka pateng. Ka Wah Umngot ka їasnoh bad ka jingim ne ka longbriew manbriew.
Ka wah Umngot kadei kawei ka ba pawnam ha ka jylla Meghalaya bad kaba la bna nam ruh ha baroh kawei ka thaiñ North East bad India, ym eh tang ba ka bsa ka ai bam ia ngi hynrei ka long ruh ka wah kaba khuid kaba kyntang ha kaba iadei bad ngi ki jait bynriew riewlum.
Kumta phim dei bad phin ym lah ban pynїakhlad ia ngi na ka wah Umngot. Ngim kwah satia ban don mano mano ban wan pynjot ne wan pynthut ia ka jinglong khuid jinglong kyntang kane ka wah.
Kumta ngi dawa jur na Sorkar Jylla ba ka dei ban pynbna paidbah bad pynmih hukum ba la pynsangeh noh syndon ia baroh ki jingthmu ban tei ia ka Dam pynmih bording elektrik bad ban Den ia ka wah Umngot. Ngim kwah da lei lei ruh ba ha kiwei pat ki snem ne ki por ban wan ba kane ka kam kan khie im biang ban pynkulmar bad pynthut ia ka jingim.
Ka Wah Umngot ba ieid jong ngi ka dei ban їai tuid laitluid bad ka kamai jakpoh jong ngi kaba ki їoh na ka ka dei ban im bad їai bteng khlem sangeh bad ngin ym shah ba ka jingrhah bor bad jingrhah spah kan bam duh.
Te kumta ngi kyrpad ha khmat jong phi ba phin buh noh da ka ain ba junom la junom ym bit ban tei dam ha ka wah umngot ne kata ka Moratorium, ka JAC ka ban jur ba kano kano ka jingpyrshang na ka liang ka Sorkar Jylla ne ki nongkyrshan kiba kwah ban pynjot ia ka wah Umngot da kaba den ia ka kin hap ban їatyngkhuh bad ki jingpyrshah kiba jur na ka liang jong ngi ki nongshong shnong bad ki paidbah.
Ka jingpyrshah jong ngi kan їai bteng na ka bynta ban pynneh bad їada ia ka wah Umngot bad ban pynneh ia ka jingїadei kaba jan kaba ngi don bad ka wah Umngot pateng la pateng.
Ka JAC lah dep phah ki shithi sha ki bor bapher bapher kiba kdew shai ia ka jingpyrshah jong ki ia ka jing den ia ka Umngot. Ka JAC ngeit ba ka ophis ba kan sa lum ia kine khnang ba phin sngewthuh ba da leilei ruh kin ym shah ia ka jingthmu ban tei ia ka dam ha ka Wah bad ia Kane ka shithi la phah ruh sha kiwei kiba dei lang ha Kane ka kam ban pyrshah ia ka jingden um ha wsh Umngot.
