Shillong, Lber 28: Ka sorkar Meghalaya kala iohi ia ka jingthoh jong ka seng GNLA kaba la mih ha ki lad pathai khubor kaba la ai bor ia ka sorkar lai sngi, na ka liang jong ka sorkar ka pynshai paidbah ba na ka liang jong u myntri rangbah ka jylla u Dr Mukul Sangma u la thoh da ka D.O letter sha u myntri kam poh iing jong ka sorkar ban dawa ba ka dei ban buh ia u ksiang ban ia kren ia suk bad ka seng GNLA.
Na ka liang jong u myntri rangbah u la ai jingmud ruh ia ki kyrteng jong ki briew kiba lah ban leh ia kane ka kam ban ia kren ia suk bad ka seng GNLA, la kyntu ruh ia u myntri kam poh iing ka sorkar pdeng ban pynkloi ia kane ka jingiakren ia suk na ka bynta ban wanrah ia ka shong suk shongsain ha ka jylla.
Na ka liang jong ki heh sorkar, u Chief Secretary jong ka jylla ha ka 25 tarik mynta u bnai u la thoh da ka D.O letter sha u Union Home Secretary jong ka sorkar pdeng ban pynsngew sha ka sorkar pdeng ba don kam ia ka jingiakren ia suk bad ka seng lehnoh GNLA ha kane ka jylla ban wanrah ia ka jingshong suk.
Na ka liang jong ka sorkar ka la pynshai paidbah ba ka sorkar ka kwah ban iathuh ba ka da thrang eh ban ioh ia ka jingshong suk bad ban wanrah ia ki kam pynroi sha ki paidbah jong ka jylla baroh kawei.
Ka sorkar jylla mynta ka dang ap ia ka jingai jingbit na ka sorkar pdeng ha kaba ia dei bad kane ka kam ban ia kren ia suk bad ka seng GNLA, la ong ka jingthoh kaba la wan ka tand political department jong ka sorkar jylla.(SP News)
