Shillong, Jylliew 30: U bah John Kharshiing u wei na ki riew rangbah mynta ka sngi u la phah da ka jingthoh sha u myntri rangbah ka sorkar jylla u Cornad K Sangma bad sha u symbut myntri rangbah ka jylla u bah Prestone Tynsong ha kaba ia dei bad ka jingsniew jong ka surok Umsning-Jagi Road kaba don 80km.
Ha ka shithi u bah John u la ong ba u la wan ia kynduh ia ki nongrep ka tei ka thain Mawhati bad ki la iaid lyngba ka surok bah Umsning – Jagi Road kaba dei ka surok kaba iasoh naduh Umsning, Nongkya, Sohpdok, Raitong, Laiphewdiengan, Mawdiengan, Mawhati, Umsohlait, Sohnidan Umtrai shaduh Umsiang bad kaba ia kynduh bad ka Jagi Road kaba don kumba 80km tam ne duna kaba la jot kaba la duh baroh shi lynter.
Kane ka surok ka long kaba la siew shisha bad ha ka kyrteng jong ki rangbah shnong ka thain bad ki nongrep la phah ia kane ka dorkhas sha ka sorkar ban dawa ia ka Mawhati District ban kynthup ia ki lai tylli ki konstitwensi ka ka Mawhati, Umsning bad Umroi Assembly Constituency.
Ha kane ka shithi la pynpaw ba ka sorkar ka dei ba kin thaw ka lad mang pisa kyrkieh ban pynbeit noh ia kane ka surok kaba dei u budlum jong ki hajar ngut ki nongrep ki khynnah skul bad khamtam ia kiba ba beh ban sha sumar sha ki hospital kaba long ka jingniew bein ia ki paidbah mynta la palat khyndai snem.
Ka jingbymdon ka surok kaba bha ka pynduh mynsiem ka pynduh lad ia ki paidbah khamtam ha ka rep ka riang, ka koit ka khiah, ka ri jingri ka pule puthi, ka jingseng ki kharkhana, bad kiwei kiwei.
Dei lyngba ki surok ba bha ngin lah ban kyntiew ia ka kamai kajih ka roi ka par ki paidbah jong ka thain ri bhoi kiba shem bun ki jingeh. La sngewdei ban pynkynmaw ba ka Ri Bhoi District ka dei ruh kaba don ha ka list “aspirational district’ kaba mut ka district kaba dang don bun ki jingduna ha ka thup ka sorkar india.
Katba ha kawei ka liang la ai ia ka jingiaroh ia ka jingkyntiew kyrdan ia ka Mairang sub-division sha ka kyrdang district kum shibynta ban pynjan ia ka synshar khadar sha ki paidbah, ha ka juh ka por ngi sngewdei ban kyntu ia ka jingkhmih bniah ia ka jingsah dien ka thain Ri Bhoi.
Ha kaba iadei bad kane ka phang la sngewdei ban kyntu ia ka Sorkar ban thaw ia ka Mawhati District nalor ka Ri-Bhoi District kaban kynthup ia Mawhati, Umsning bad Umroi Assembly Constituencies kum shi bynta ban nang pynjan ia ka synshar khadar sha ki paidbah bad ban pynsted ia ka roi ka par na ka bynta ki paidbah kane ka thain.
Ka la dei ruh ka por ia ka jylla ban pyrkhat bniah ia ka rukom thaw surok khnang ba kan nym sep ei ka jingpynlut da ki phew crore namar ngi shem bun ki surok ki jot noh tang hapoh khyndiat por.
Kim dei shuh ban shuh kynnoh ia ka mariang bad ia u slap. La donkam ia ki kyndon kiba phyrkhing ha kaba kin don da ki “independent road construction inspections” ha shwa ban pynlait ia ka pisa shna surok. la donkam ban pyntreikam ia ki kyndon NHAI khnang ba u paidbah un ioh ia ki surok kaba biang katkum ka jinglut bad kaba neh kham slem.
Ka surok Umsning – Jagi Road kaba dei ka State Hghway ngi ioh jingtip lyngba ki lad khubor ba ka dei ban ioh ia ka pisa na ka ADB hynrei haduh kine ki sngi ngim tip kane ka project ka la poi shano. Ki paidbah ha shi lynter kane ka surok Mawhati ki iam paitbdohnuh da ka jingkhuslai halor kane ka surok mynta la palat 9 snem.
Ka long ka ba shitom ka leit ka wan ha kum kane ka surok ym lah mutdur shuh ia ka jingshitom ki nongleit nongwan khamtam ki nongrep ki khynnah skul bad kiba ia beh ia ka koit ka khiah.
Kumta ngi kyntu jur ia ka sorkar MDC ban thaw ki lad mang pisa kyrkieh ban wad noh da kiwei ki lad ban thaw thymmai ia ka surok Umsning – Jagi Road ban pynlait ia ki paidbah kane ka thain na kane ka jingeh, kane ka long katkum ka dorkhas kaba la phah da u bah John F Kharshiing sha ka sorkar mynta ka sngi.
