Shillong, Jymmang 21: U bah Titosstatwerll MDC jong ka Dohra mynta ka sngi u la phah da ka jingthoh sha u Myntri Rangbah ka jylla u Cornad K Sangma ban kyntu ia ka sorkar ban pyntrei kam noh ia ka karkhana shna dewbilat jong ka sorkar kaba don ha Sohra ia kaba la tip kum ka Mawmluh Cherra Cement Limited.
Ha ka shithi u CEM ka KHADC u ba long ruh u MDC ka Sohra Constituency u la pyni ruh ia ka jingeh ba ki nongshong shnong ka thain Sohra ki mad namar ka jinglong jingman mynta na ka khlam Covid-19.
kane ka karkhana pynmih dewbilat kam shem la ioh ia ki mar ki matta ban sdang noh ia ka jingtrei ha ka ba kane ka la wan rah ia ka jingeh ha ka ba iadei bad ka ioh ka kot jong ki nongshong shnong ki ba bylla ha ka ne ka Karkhana pynmih dewbilat.
U CEM jong ka KHADC u la kyntu ia u myntri rangbah ka jylla ba yn wad ia ki lad ki lynti ba kane ka karkhana pynmih dewbilat kan ioh ban sdang noh ia ki kam ki jam khnang ban lah ban weng ia ka jingeh ki nongbylla ha ka ne ka karkhana.
Ha kawei pat ka shithi U CEM jong ka KHADC u la kyntu ia u myntri rangbah ka jylla ban pynbiang ia ki Ambulance 108 na ka bynta ki ar tylli ki C&RD Block, kata ha Laitkroh-Khadar shnong C&RD Block bad ha Shella-Bholaganj C&RD Block.
Ha ka ne ka shithi u CEM u la iathuh ba kine ki ar tylli ki C&RD Block kim don ia ki kali Ambulance ki ba biang ki tiar ki tar ban kit ia ki nogpang ki ba ioh ia ka jingpang Covid-19.
