Shillong, Risaw 16: Mynta ka sngi ha ka jingialang kaba la long ha City Dhaba u kyrtong ka BJP na 17-Shillong North u bah M Kharkrang la thung ia u Santanu Borthakur kum u president ka shnat Bivar Road ha dien ba ki nongkyrshan ka party kila jied ba un longu president.
Ha ka jingialang kaba la long mynta ka sngi palat spah ngut ki briew kiba la ia poi sha kane ka jingialang ban ia kren kumno ban pynkhlain ia ka party ba kin ia trei shitom ban pynthikna ba ka party BJP kan poi sha ka jingjop.
Ha kane ka jingialang la don lang ruh u Vice President jong ka state BJP party ha kane ka jylla Meghalaya u Dipayan Chakraborty, ha kane ka jingiakynduh lang jong ki nongkyrshan ka party kila ia mir jingmut kumno ban dang pynkhlain shuh shuh ia ka party ha katei ka dong.
Ka jingiapan tiket na ka party BJP na ka 17-North Shillong mynta ki don sa tang ar ngut bah M Kharkrang bad u bah Michel Kharsyntiew, ban rai ia ka tiket mano ban ioh katkum ka jingpyniaid party ka shong ha ka jingbun ki nongkyrshan na ki shnat ka party ha baroh ki konstitwensi.
