Shillong, Nailar 13: Mynta ka sngi u MLA jong ka Mawlai u bah Process T Sawkmie bad ki bun ki seng bhalang kila pynrem jur ia kane ka jingsiat iap jong ki pulit ia u nongialam ba rim ka HNLC u bah Cheristerfield Thangkhiew u ba la dep ban pyndem ha khmat jong ki pulit bad kila dawa ba dei ban thung ia ka jingtohkit halor kane ka jingshah siat iap ha ki pulit.
U bah Process T Sawkmie MLA jong ka Mawlai u la dawa ba dei ban thung ia ka kynhun tohkit ban lap ia ka jingshisha halor kane ka jingshah siat iap jong u tei u nongialam ba rim ka HNLC ba la wan ban pyndem ha kti ki pulit mynta ka sngi.
Ka seng HYC seng kmie ka dap da ka jingsngewsih kaba khraw halor kane ka jingshah pyniap jong u Cheristerfied Thangkhiew na ka liang ka seng ka phah ia kane ka khubor sngewlem sha kiba ha iing ha sem baroh halor kane ka jingjia kaba sngewsih.
Ka HYC ka pynrem jur ia ka tnad pulit ka Meghalaya halor ka Jing leit siat briew Jong ki ha ka miet ka iong ba ngi shim ba ka Jingshah siat u bah Cheris ka dei ka kam pyniap briew. Kam dei ka Jingiada ia lade ne ka nongiakhun mar kylliang kumba Kam ki pulit .
Ka jingong ki pulit ba u bat wait tari ba hap siat iap noh ka long ka bym lah pdiang namar. Hato ka shong hok ia ki pulit ban siat briew tang namar ba bat Tari, Hato baroh kiba don Tari ha ing hap shah siat noh ha ki pulit.
Ka Jingiapher hapdeng ki pulit bat suloi bad ki kynhun kieng atiar ka long ba ki pulit ki bud ia ki Ain ha shwa ban pyndonkam suloi , Lada ki pulit Meghalaya kim bud Ain shuh ha shwa ban pyndonkam ia ka ktang suloi te yn ia pher aiu hapdeng ki pulit bad ki kynhun kieng atiar. Ka HYC ka daw ba dei ban pynlait mardor ia ki khun kiba la kem da ki pulit.
U Myntri kam poh iing u Bah Lahkmen Rymbui u dei ban hiar shuki noh mardor bad u dei ban beh kam noh mardor bad ban pynngat ha ki kyndon pyniapbriew ia baroh kito kiba sait iap ia u bah Cheris bad ka jingpynshitom wat ia kito kiba ia sylla ruh.
La kyntu ia ka Meghalaya High Court bad ia ka Meghalaya State Human Rights Commission ban shim bishar da lade ia kane ka Kam.
Ka HYC ka dawa ba ka sorkar ka dei ban thung ia ka kynhun tohkit bad ban khlieh ia ka kynhun tohkit ym duna da u nongbishar jong ka High Court. Ka Seng Kan nym sngap jar ia kum kine ki Kam pyniap briew da ki briew ka Ain namar lada sngap ki ba bun ki ba lui lui kin sa Shu shah siat iap man ka sngi.
Ka HYC ka kwah ruh ban kylli ia ka sorkar Meghalaya halor ka policy treikam Jong ka halor ka Jing ia kren ia suk bad ki kynhun kieng atiar khamtam eh bad ka HNLC.
Kumba la pynpaw da ka HNLC u bah Cheris u dei u ksiang ban wanrah ia ka Jingiakren ia suk bad ka HNLC ka kwah ruh ban don ia ka jingwan ia kren ia suk. Mynta pat ki pulit Meghalaya ki siat iap noh ia u , hato ka Sorkar Meghalaya ka kwah ne em ban kren ia suk haba kumne.
Ka sorkar ka dei ban kren Shai bad ngi dawa ba ka Meghalaya police ka dei ba sangeh mardor ia kane ka Jing pyniap briew, ia ka jingpharep lamwir bad ia ka jingkem dusmon ia ki briew lada ka thrang shisha ia ka jingsuk ba kan wan ha ka Jylla, la ong u bah Robertjune Kharjahrin President ka HYC seng Kmie.
Ka seng JSU ka dap da ka jingsnewlyngoh bad sngewphllya halor ka jinshah pyniap u Rangbah Chesterfield Thangkiew bad ka seng kam lah ban pdiang iaka rukom leh bor ki pulit ban shu siat iap beit ia u Bah Chesterfield Thangkiew mynne ka step haka ing sah jong u.
Ka seng ka lah ong ruh haka jingshisha lah dei ban shu rah bad sa tohkit shuwa ia u halor kino kino ki kam kiba ki pulit ki suba ia u ba u donkti ha kino kino ki kam pyntriem bad ka seng kam lah khlem da pynrem jur ia ka tnat pulit jong ka jylla namar ka jingleh ka jong ki ka long pyrshah iaka hok long briew namar tang hapoh ka shi khyllip mat ki shim noh iaka jingim u ne u rangbah.
Ka seng ka kwah ruh ban pynsngew ba ki pulit kim dei ban nioñ daka bor ban shu pyndonkam da ki ktang suloi hynrei ki lah dei ban rah ban tohkit shuwa namar ka jingpyndonkam daka tiar kan ym lah ban wan rah iaka suk saiñ hapoh ka imlang ka sahlang bad ka jingshah siat iap jong une rangbah ha khmat jong ki khun ki kti ka ktah shisha iaka ing ka sem baroh kawei.
Ka seng ka phah ruh ka kyrwoh sngewlem sha ka ing ka sem jong u bah Chesterfield Thangkiew ba u Blei nongbuh nongthaw un don lang ryngkat bad ka ing ha kum kane ka por ba u lyoh ba dum u wan kah ha ka ing ka sem.
U President ka HANM u bah Lamphrang Kharbani u la pynrem jur ia kane ka jingsiat iap ki pulit ia u bah Cheristerfield Thangkhiew, na ka liang jong ka seng kala dawa ba dei ban thung ia ka kynhun tohkit kaba laitluid halor kane ka jingjia, ka seng ka dawa ruh ba dei ban pynlait mardor ia ki khun kiba la shah kem.
U President ka seng Khasi Jaintia National Union u bah N N Sahdap u la pynpaw ia ka jingsngewkyndit ka jong u halor ka jingkhlad ba kyndit jong u nongialam ba rim ka HNLC bala pyndem ha khmat ka ain, ka seng ka phah ia ka khubor sngewlem sha kiba ha iing ha sem ha lor kane ka jingjia kaba sngewsih.
Ka seng EJNC ka dawa na u myntri kam poh iing u bah Lahkmen Rymbui ban pynshai paidbah na ei ki pulit ki ioh bor ban siat iap ia u nongiam barim ka HNLC bala pyndem wait u bah Cheristerfield Thangkhiew bad ka seng ka dawa ba dei ban aiti ha ka CBI ban tohkit halor kane ka jingjia la ong u bah Nangjan Dkhar general secretary ka seng.
