Shillong, Jylliew 28: Mynta ka sngi ki nonghikai Adhoc ha poh jong ka lama jong ka “Federation of All School Teachers of Meghalaya (FASTOM) kila leit tur biang ban ieng khmat secretariat ban pynpaw sha ka sorkar ba ki dang iaid bteng ia ka jingdawa jong kib an pynkiew ia ka tulop kumba kila dep ban ia kren ha kine ki bnai kiba la dep.
Haba kren ha ki lat pathai khubor u bah Mayborn Lyngdoh nongai ktien ka FASTOM la ong ba kila shah shet ha kane ka sorkar ia kaei kaba kila ia kren ha ka 12th Jymmang 2022, kane ka sorkar kam shym la bat ia la ka kular.
Ka jingiakhih jong ki nonghikai Adhoc ka long ba ki dawa na ka sorkar ban pynkiew ia ka tulop T.18000/- tyngka kum ka jingsdang bad ka dei ban kiew pat da 5% man la u snem ia kaba ka sorkar kala ong ba kin sa ia kren hapoh ka kabinet hynrei lai tylli ki jingia shong kabinet ka sorkar kam shym iakren ei ei.
Ka jingwan jong ki mynta ka sngi ka long ban pynpaw sha ka sorkar ba ki dang iai dawa ha kaba ia dei bad ka tulop ka jong ki bad kane ka jingiakhih kaba mynta ka dei kaba khlem buh por kin ia khih haduh ba kin da ioh ia ka jingdawa jong ki.
La kynnoh ba haba ia dei bad ka MeSEB ka sorkar ka shim kloi ia ka rai namar ka don jingmih katba ia ki nonghikai kaba hap hapoh jong ka tnad pule puthi kim shym poi ia kren namar ka dei ka tnad ba don tang ka jinglut, la kynnoh u bah Mayborn Lyngdoh.
Ha kane ka sngi da ki phew ngut ki nonghikai Adhoc kila ia poi ban ia shim bynta ha katei ka jingiakhih ha khmat jong ka Secretariat, lah ban pynkynmaw ha bnai Jymmang mynta u snem kila pynlong ia ka jingiakhih kaba tyngeh ha kaba ka sorkar kala khot ia kren ia ki halor ka jingdawa jong ki.
Lah ban pynkynmaw ba kham mynshuwa naka liang jong u myntri rangbah ka jylla u la ong ba kam dei kaba suk ban shu shim ia ka rai namar kane kan ktah palat spah klur tyngka bad lada ka sorkar kan shim ia ka rai kan hap ban shim lang ruh ia kiwei, halor kane ka sorkar kala bthah ia ka tnad pule ba kan peit bniah.
