Nonghali, Kyllalyngkot 09: Ki paidbah na ki khatsan tylli ki shnong hapoh ka lama jong ka Synjuk Nongsynshar Shnong Par Umkhen mynta ka sngi kila pynlong ia ka jingpakhang lynti ha Nonghali ban pyrshah ia ka jingsngap paidbah ban buh ia ka Marten ha shnong Nonghali.
U bah S Rngaid President katei ka synjuk u la ong ba ka jingpyrshah ka jong ki ia kane ka jingsngap paidbah ban buh ia ka Marten ka long ba kam pat don ka jingiasngewthuh ha shnong ha thaw la kynnoh ba dei ka jingleh don bor jong u sordar.
Ha kane ka sngi da ki spah ngut ki nongshong kynthei bad rangbah na katei ka thain kila ia poi sha katei ka jaka Nonghali ba pakhang ia ka surok ban nym shah ia ki briew jong ka MSPCB ban pynlong ia kane ka jingsngap paidbah.
Na ka liang jong u Additional Deputy Commissioner jong ka East Khasi Hills District u la ia kren bad ki nongialam jong katei ka synjuk ba ki dei ban pynthikna ba kan nym don kano kano ka jingjia kaba sngewsih ha kaba ki nongialam ka synjuk ruh kila ai ka jingkular hynrei kin nym ailad ban pynlong ia ka jingsngap paidbah ha Nonghali.
Ha dien ka jingia kren bad ka jingpyrshah jong ki paidbah na ka liang jong ki bor ba dei ban pynlong ia ka jingsap paidbah mynta ka sngi ka MSPCB kala shim ia ka rai ban pynsangeh noh shuwa ia kane ka jingsngap paidbah mynta ka sngi.
Ha kane ka jingpyrshah ki paidba kila rah ia ki pla kard kiba la thoh pyrshah ia ka sorkar bad ia ki daw kaba ki pyrshah , kila pynlong ruh ia ka jingrah lama iong kum ka dak jong ka jingsngewsih ba la pynlong ia ka jingsngap paidbah khlem da pyntip ha ki shnong ki thaw.
Na ka liang jong District Administration kala pynpoi ruh shibun ki pulit ha katei ka jaka ban pynthikna ba kan nym don kano kano ka jingjia kaba sngewsih ha kane ka sngi kaba ka MSPCB ka pynlong ia kane ka jingsngap paidbah ia ka marten.
