Shillong Naiwieng 26: Ka Save Hynniewtrep Mission ka kynhun ki segn bhlang kiba kynthup ka HYC,HANM, EJNC, JSM bad ka CORP mynta ka sngi ki la thang ia ki tyngshop jong u Conrad K Sangma myntri rangbah ka jylla Meghlaya bad Assam u Himanta Biswa Sharma bad u Myntri ka tnad Kam pohiing ka sorkar pdeng u Amit Shah.
Kitei ki san tylli ki seng ki la leit ban thang ia ki tyngshop ha jan jaka sah jong u myntri rangbah kane kala pynbitar namar ka sorkar kala pynslem ia ka jingpynbeit ia u pud u sam kaba la wan rah ia kane ka jingiap ki sn ngut ki briew ha poh ka shnong Mukroh ha West Jaintia Hills District.
Ha shwa ban thang ia ki tyngshop la ioh ia ka jingkren na u President ka HANM u bah Lamphrang Kharbani, u la dawa ba ka sorkar kan pan noh da ka jong ka kynhun shipai khnang ban khlain ka jingtreikam kumba long ha kiwei ki jylla, la kynnoh ba ka sorkar Meghalaya ka long niangkohnguh ha ka sorkar Assam ha kine ki 50 snem.
Buh ia ki Police Outpost ha Khappud hynrei ym dei ban buh ia u heh uba dei na kiwei ki jaidbynriew, kum ha Mukroh dei ban buh da u nong Jaintia , ha Langpih dei ban buh da u West Khasi hills namar ki tip ia u pud u sam, ong u bah Kharbani.
U la ong ba lada ka sorkar kam lah ban iada ia ka jaidbynriew, ia u pud u sam, ka khyndew ka shyiap kadei ban ai laisen suloi ia ki dkhot jong ka jaidynriew kiab la don 18 snem shanenng kiba don ha Khappud ban iada hi ia u pud u sam.
Katba na ka liang u President ka HYC u Bah Robertjune Kharjahrin, u la ong ba ka jingkhang ia ka Internet ha kane ka jylla ka la pynduh ja ia ki paidbah kiba kamai bad im jakpoh bad ka la pynthut ia ki samla kiba pynkhreh ia ka eksam.
U la ong ba kawei na ka jingthmu ba ka sorkar ka khang ia ka Internet, kadei tang ban iada ia ka jingtlot jong ka NPP ha ka ilekshon ha u 2023.U Bah Kharjahrin u la kynthoh ruh ba ka jingpynjari ia ka kyndon CrPC 144 ha sor Shillong ka long ban nym shah iano iano ban iakhih paidbah namar ioh rem kput ki MLA kiba don ha ka bor.
