Shillong, Iaiong 19: U Bah Adelbert Nongrum u la shu pynskhem jubor ia lade kum u President ka seng lyngba ka press statement haka 09 tarik Iaiong 2021. Ka jingkam jong u ba ka ECI ka la pynskhem biang ia U kum u president ka long ka bymdon jinshisha. Hangno kata ka jingthoh? Ngi kwah ban kylli.
Ka High Court badonburom ka la kyrpad ia ka ECI ban bishar bniah biang ia kane ka kam party namar ba kadon ka kynrum kynram. Bad Ka ECI ka la phah pat ka shithi ba khatduh sha nga bad sha U Adelbert Nongrum ha ka 20th Nov 2020 bad la bthah ia ngi baroh arliang ban ia pynbeit da ka jingiasngewthuh jingmut.
Ka ECI ka la kubur bad pynpaw ruh lyngba kane ka shithi ba don ka jing kynrum kynram ha ka party ia kaba donkam ban pynbeit. Khlem da pynbeit kan long kaba bakla ia U Adelbert Nongrum ban pynskhem president da lade ia lade.
Ka jingkhot ia suk u Bah Adelbert ka long kaba thamula bad kamdei ka jingkwah iasuk kaba shisha. Nga kwah ban pynkynmaw ba nga la juh pyntip sha U ban iakren iasuk naduh shwa ka MP Election 2019 bad haduh kine ki sngi, hynrei ngam poi pyrkhat ba un khot kylla ia nga sha ka jingiasuk lyngba ki lad pathai khubor.
Ia nga la jied kum u president ha ryngkat ia kiwei ruh ki dkhot ka CEC lyngba ka General Convention jong ka party ha hall polytechnic haka 27 tarik Kyllalyngkot 2017 ia kaba baroh ki la sakhi naduh ki press ki media ter ter. Hadien kane khlem long General Convention lane General Council ha ka party.
Nga kwah ba ki paidbah kiba stad kin bishar bad wad ia ka jingshisha. Mynta ruh lyngba ka internet lah ban iohi ia kata ka General Convention jong ka seng ha u snem 2017 ha kaba U Adelbert Nongrum ruh u don bad la jied ia u kum u working president, mynta ruh lah ban iohi ia ki khubor ieh noh kam jong U Adelbert Nongrum, had
uh mynta lah ban iohi ia ka khubor ba u dawa hiar shuki ia nga na ka post president.
U Adelbert Nongrum u la pynpaw pyrthei ia ka jingthut ia ka seng namar ba u pyrshah ia ka rai jong ka CEC, namar ba u la klet ba ha ka synshar paidbah ka sur jong u ba bun balang kan hap ban ieng, u la resigned bad u la dawa hiar shuki hynrei namar ba ka CEC kam mynjur ia ka jingdawa.
Namar shwa ka election ban bujli President kan pyntlot ia ka seng. Hynrei ngi sngewsih pat ba u la leit da kaba rieh khlem ka jingtip jong ngi sha ka ECI ban ialam bakla shaphang ka jinglong jingman jong ka seng.
U Adelbert Nongrum u la thoh sha ka ECI ha ka 14-9-2018 ba U la pynlong ia ka General Council jong ka seng ha iing sah jong U haka 6 tarik Nailar 2018 bad u la ialam bakla ruh ia ka ECI da kaba ong ba um don dkhot shuh ha ka seng lait noh ma u marwei.
Hynrei hadien ka jingujor jong ngi, sha ka ECI, ha kaba ngi la pyntip ryngkat ki sakhi ba U MLA jong ngi u ba kam president ia lade ryngkat U Bah THS Bonney u ba kam Secretary kidei ki ba la dep resigned na ka seng.
Kum ka party kila pyni ruh ia ka constitution jong ka seng ha kaba la thoh shai kdar ba U President u dei ban pyniaid ia ka General Convention/Council jong ka seng. Dei na ka ne ka daw ban ngi la juh pynskhem ba U Adelbert Nongrum u la ialam bakla ia ka ECI da ki shithi bad ki jingthoh ki bym don jingshisha.
U ba bun balang u tip ba ia ka General Convention/Council la juh khot ha ki hall ha ka jingiadon ryngkat ki dkhot baroh, ha ka jingiadon ryngkat ki riewrangbah ki nongshahkhot sngewbha bad ki press ki media.
Hynrei U Adelbert u ong ba la pynlong ia ka General Convention ha iing sah jong U, ia kaba ki dkhot jong ka seng kim don jingtip, ki press ki media ki khlem sakhi bad ngi tharai tang ki para marjan marpa ruh kim don jingtip.
Ma nga bad wat kiwei ki dkhot ka CEC ngim don jingwit lada long President U Bah Adelbert, hynrei kadei ban long da ka lynti, katkum ki riti treikam jong ka seng, ha bashit haba shai, haka jingdon lang jong ki dkhot baroh, ha khmat ka jingsakhi ki press ki media bad ki nongshahkhot sngewbha.
U bah Pyndap u la ong ba u la pynpaw ha U Bah Adelbert ba ngan shongthait noh bad ban aiti ia ka kam president sha U ynda la kut ka term ha ka General Council kaba dei ban long ha u snem 2019, hynrei phewse u la shu kwah ban shu knieh jubor bad leh donbor.
Ka jingleh jong U MLA jong ngi ka la pyntroin ia ka seng ia kaba ngi sngewthuh lut. Ka jingiakhun jong nga bad ki para dkhot CEC mynta ka long ban pynieng ia ka hok bad ka jingshisha ym da dei shuh ba kwah long president.
U paidbah U dei ban sngew phylla ba kumno baroh ki dkhot CEC ba la jied ha ka GC ka seng ki don ryngkat bad nga hynrei U Bah Adelbert Nongrum namar ba um ioh jingshaniah na ki para dkhot u la leit khroh ia ki dkhot ba la resign ban long dkhot nongkyrshan jong u.
Lada U Bah Adelbert Nongrum U kwah pynbeit ngi long ki ba kloi bad lada u kwah ban long President ruh nga kloi ban lum ia ka GC, bad ngam don jingmut ban ia khun ia ka post president ruh, hynrei nga bad ka CEC ka dei ban pynthikna ba ki kam kin iaid katkum ki riti treikam ka seng, ong u bah Pyndap Saibon President ka KHNAM CEC.
