Shillong, Jymmang 28: U District magistrate jong ka Ri Bhoi District mynta ka sngi u la pynbna paidbah ba la pynjari ia ka kyndon 144 CrPC ha baroh kawei Ri Bhoi District naduh mynta ka sngi haduh ban da pynbna da kumwei pat
Haba pynbna ia kane ka kyndon 144 CrPC haba jong ka District na ka liang jong u District magistrate u la ong ba ha ka 27.5.2017 mynta u bnai kala don ka jingjia hapoh ka shnong Ronghana ha kaba ki paidbah kiba la ia lum kumba 150 ngut ei ei ha kaba la kynnoh bad ki dei ki dkhot jong ka seng KSU na ka seng kmie bad jong ka North Khasi Hills kila shoh la dat ia ki nongtrei jong ka Railway bad thang ia ki tiar ki tar kiba dei jong ka Railway.
Ha kane ka jingjia na ka liang jong u District Magistrate u la ioh ia ka jingtip ba kila don ki briew kiba trei bad ka Railway kila mynsaw bad ka jingshah thang ki tiar ki taw jong ka Railway kiba dei ki tiar kit ar jong ka sorkar bad kane ka jingleh jong kine ki briew kala wanrah ia ka jingjulor ia ki jingdon jingem jong ka sorkar ha katei ka jaka.
Ha katei ka juh ka sngi la ong ba ki dkhot jong ka KSU kila pyrshang ban khang lynti ia ka surok bah Shillong Guwahati ha Shangbangla da ka jingthmu ban thang ia ki kali ha kane ka jaka, bad kine ki juh ki briew kiba la wan phai na Byrnihat kila ktah kti ia ki pulit kiba don ha kane ka jaka kiba la pyrshang ban kem ia kine ki nongleh kam runar.
Kine ki juh ki paidbah haba la wanrah ha Nongpoh Police station, la ong ba hapoh ka jingialam jong ki nongialam ka seng KSU kila ialeh pyrshah, ym tang kata kila byrngem ruh ia ki briew sorkar kiba don ha kaba pyndep ia ka kam jong ki.
Ki bor jong ka District kila ioh jingtip ruh ba kala don ka jingsaphriang kane ka jingjia ha kylleng bad na ka liang jong ki bor ba dei peit ia ka District ki ioh ba kane kan wan rah ia ka jingiamynsaw hapoh jong ka District kaba lah ban ktah ia ka suk ka sian hapoh jong ka District kumta katkum ka bor kaba la pynkup hapoh jong ka kyndon 144 jong ka Criminal procedure code 1973, la khang pyrshah ia kano kano ka jingialum briew palat ia ka san ngut ha ki jaka paidbah ha baroh kawei ka bynta jong ka Ri Bhoi District, lait noh tang ha ki skul college kiba dei ki jaka pule. La khang pyrshah ban rah ia kino kino ki suloi bad ki tiar pynmynsaw, la shah tang ia ki pulit, ki kynhun shipai bad ia ki shipai.
