Shillong, Naiwieng 23: Ka HNLC ka pynpaw iaka jingbitar halor ka jingleh mradkhlaw ki pulit Assam, ka seng ka pynrem jur pynremjur iaki Pulit Assam kiba lah siat pathar khlem jingisynei iaki paradoh parasnam jongngi ha Block 1.
Kane kam dei ka sien ba nyngkong ba ka Sorkar Assam kan thombor bad siat pyniap iaki briew ha khappud,Ka daw tynrai baroh ka dei namar ba ka Sorkar Meghalaya ka long kaba tlot.
Haka jaka kaba ka Sorkar India kam don mon ne kam lah ban weng iaki jingeh ka jylla Meghalaya halor u pud u sam, ka sorkar Meghalaya ka dei ban sngewthuh ban leh laka jong ka kamram,da ka sngewthuh ba duna haki bor pulit,ka lah dei ban pynrung kam pulit iaki riew paidbah.
Kaban long haka dur ka ‘conscription’ kumba pynrung kam shipai ha kiwei ki ri khnang ban wanrah iaka jingshongsuk shongshngain khamtam ha khappud lym kumta yn sa long kum ki nong palestine ban shu kylla phetwir kha ma kha hala ka jong ka ri.
Ka Jingkam naka liang ka Sorkar Assam ba ka Mukroh ka hap hapoh ka west Karbi Anglong ka pyni shaikdar ba kane ka jingjia ka dei ka kam kaba ki lah pynkhreh bha khnang ba ki paidbah kito ki thain kin sheptieng bad rung noh sha Assam haka kylla kaba ar haka jingpynbeit pud ki 2tylli ki Jylla.
Ka Jylla Meghalaya ka lah ioh iaka iing kaba khlem u pud u sam, bad ka jingmynthi ka Sorkar kmie ban pynbeit ia u pud u sam ka lah wanrah pynban iaka jingiaumsnam ym tang ha Meghalaya hynrei ha kylleng ka thaiń shatei lam mihngi.
Kane imat ka lah dei lypa ka kam ialehkai haka sain hima ka sorkar kmie khnang ban pyntlot bad ban khanglad iaka jingiatylli ha kine ki Jylla ha Northeast.Ka mat ban ioh iaka Jingithuh na bynta ka iing lajong bad u pud u sam ba tikna ka bri u Hynńiewtrep ka dei ka jingdawa kaba hakhmat eh jong ka HNLC.
Ka HNLC ka kyrmen ba kane ka jingiakren iasuk bad ka Sorkar kan long kaba seisoh khnang ba ngin lah noh ban weng iaka jingeh ka Jaidbynriew.Lada jia ba kane ka jingiakren kam biang,ka jingialeh jong ka HNLC kan dangiai bteng wat lada kan shimpor sa 35 tylli ki snem.
Lada ka jingsuk ka mut ba ki hap ban kbum iala ka shyntur haka saw ka sian, kim kwah ia kata. Lada ka jingsuk ka mut ba ki hap ban shu ieng pdeng halor ka jinglehbym hok ia kata ruh ngim kwah namar ka jingsuk kiba dangim ka pher naka jingsuk kiba lah iap ong u bah Saińkupar Nongtraw General secretary cum Publicity secretary,HNLC ha ka kyrwoh.
