Tura, Lber 13: Ka seng National People’s Party (NPP) mynta ka sngi kala pyntip paidbah ba u Purno A Sangma yn leit ban thep ia ka nomination jong u na ka bynta ban ia khun ia ka MP election na 2-Tura Parliamentary seat kaban long ha ka 9 tarik u bnai ban wan.
Ia ka jingialang kaba la long mynta ka sngi la pyniaid da ka MP jong ka Tura ka Agatha Sangma kaba dang shu rung shen ha ka seng NPP. Ha kane ka sngi u myntri pla pisa barim ka jylla u Conrad Sangma ruh u la don lang bad u MP ka Rajya Sabha ba mynshuwa u Thomas Sangma ruh u la ia don lang ia kane ka jingialang la pynlong ha iing jong u Purno.
U Purno yn poi sha Tura ha ka 20 tarik mynta u bnai bad yn thep ia ka nomination jong u ha ka 21 tarik mynta u bnai.
U Conrad Sangma u la ong ba ka phang kaba ha khmat eh kaba ka NPP kan leit sha u paidbah ka dei ka jinglong jong ka shong suk shong sain ha ka Garo Hills, ka jingbym don ia ka roi ka par. Ka seng NPP ka la rai ban trei na ka bynta u paidbah bad kin dang iai bteng ia ka jingtrei ka jong ki na ka bynta u paidbah.
Ki nongialam jong ka seng NPP kiba na Chhattisgarh bad Rajasthan kin sa wan ban ialap election ha garoHills na ka bynta jong u president ka party u Purno Sangma. Kumba ka long mynta na ka liang jong ka Congress kam pat shai mano ban ia khun pyrshah la ka dei u Zenith Sangma lane u Daryl William, wat la u Dr Mukul bad u Bah Lapang ki la ong ba u dei u Daryl.(SP News)
