Shillong, Naiwieng 01: Mynta ka sngi ka Khasi Hills Autonomous District Council kala pynlong ia ka jingbuh syntiew ha khmat u dur mot jong u Rev. J J M Nichols Roy ban kynmaw burom ia kane ka sngi khlad kaba 63 snem jong u tei u kpa jong ka District Council.
U Chief Executive Member jong ka KHADC u bah Titosstarwell Chyne ban rakhe ia ka sngi khlad ba 63 snem jong u Rev J J M Nichols Roy la ong ba don ki khep kiba ka EC ka klet ia kane ka sngi, hynrei kane ka EC kaba mynta ka ialeh ban kynmaw burom ia une u rangbah.
Kane ka jingkynmaw burom ka long ban pynkynmaw ia kaei kaba u la leh ha kane ka jaidbynriew, ia ka jingioh ia ka Sixth Schedule dei ka jingtrei shitom jong u ne u rangbah ha dien bala ioh ia ka jinglait luid bad pyniasoh bad ka Ri India ha kaba ki khasi State kila ia soi ia ka Instrument of Accession.
Ha kato ka por u bah Rev Roy u la iohi jngai ba don kam ia kaei re kaei ban ia da kyrpang ia ka jaidbynriew, namar lada ia jngilang ha ka duriaw kaba heh kum jaidbynriew kaba rit lah ban jah lynti noh, dei na kane ka daw u tei u rangbah u la pyrkhat kaei kaba dei ban don ban iada kyrpang ia ka jaidbynriew.
U la pyrkhat ba dei ban don ka jingiada kaba kyrpang ia ka khyndew ka shyiap, ka Riti Dustur, ka rukom synshar khaddar bad kumta ter ter, dei halor kane ba la ialeh pynioh ia ka khynrgit kaba hynriew hapoh ka Riti Synshar jong ka Ri India.
Ha kane ka sngi u CEM ka KHADC la ong ba u bah Joy umjuh sdang ia kano kano ka jingialang khlem ka jingduwai, nalor ba u dei u nongialap hynrei u dei ruh u nongsain pyrthei, bun sien juh ong ba ka politik ka dei kaba jakhlia bad haduh mynta ruh dang ia mynjur ban ong ba ka politk ka dei kaba jakhlia.
Hynrei kumno u ne u rangbah u wan ban ia kyrsum bad ka politk, hynrei ha ka jingiohi ka jong u haba u rung sha ka politik ka long ba kumno ban pynkylla ia ka synshar khaddar, kumno ban wanrah ia ka synshar khaddar kaba khuid, haba u leit ban ialap elekhson u juh hikai bha ia ki paidbah naduh kato ka por ba kim dei ban ia biej pisa, kamdei tang mynta.
Katkum ka khana pateng kaba don hapdeng ka jingpang ha ka 31st Risaw haodeng ka jingthiah pang u la pynlong ia ka jignduwai kaba kyrpang na ka bynta ka District Council bad na ka bynta ka khappud u la iohi lypa nadu katei ka por.
U CEM jong ka KHADC u la pynkymaw ba naduh ka por ba u bah Joy u long u dkhot ka Parliament kala don ka jignpyrshang ban shna ia ka ain ban nym shah ban ialap niam bad ban nym shah ia ki briew kiba na bar ka Ri India ban wan ialap niam sha Ri India.
La ong ha kata ka por u la lynga pisa namar u don marwei, hynrei u la pynlong ia ka jingduwai bad shah jyngjit bad ha kaba khatduh ka Parliament kala thaw ia ka kommittee bad u la shah thung ban long u dkhot ka kommittee bad u wei na ki dkhot u la ong ba u blei jong me u la sngap bad kata ka kommittee kala phah sha parliament ban nym rah shuh ia kata ka ain.
Ia kane ka jingialang la pyniaid da u nongbishar ka KHADC u bah S. Kharsyiemlieh, kiba la kren ha kane ka sngi long u Rev R. Imiong na ka Balang u blei, kibala ia don lang ki long u bah Teiborlang Pathaw EM, bah Martle Mukhim EM, bah Sherbor Mawlong MDC, la don lang bah DG Syiemiong Secretary bad kiwei kiwei ki ophisar jong ka KHADC.
