Shillong, Nohprah 09: Mynta ka sngi ki lai tylli ki seng ka MeCAW, ka NEHUTA bad ka MeTTA kiba don hapoh jong ka skul bah North Eastern Hill University (NEHU) ki kyntu ia baroh ki dkhot jong ka “Academic Council” ba kin ia shim bynta ha ka jingialang ka ban long la shai ka sngi ban pynrshah ia ka jingthmu jong u Vice Chancellor u Prof . S K Srivastava ban pynkylla ia ki rule jong ka skul bah.
Haba kren ha ki lat pathai khubor mynta ka sngi u shongknor jong ka MeCAW u Dr Roykupar Synrem u la ong ba ka jingkhot jong u VC ba shipor ia ka jingialang jong ka Academic Council la shai ka sngi ka long beain, namar ka ain ba dei jong ka NEHU ka long ba u VC ba shipor u lah ban peit tang ia ki kam kiba man ka sngi ban iaid beit ka skul bah.
Ka jingpyrshah jong ki lai tylli ki seng ka long namar ba u VC ba shipor u khot ia ka jingialang la shai ka sngi bad kawei ka mat iakren ka long ban wanrah ia ka jingkylla ha ka Statue jong ka NEHU para 2 (2a) kaba u VC ba shipor un nym lah ban leh ia kane ka bynta, la kynnoh ba ka jingthmu jong u ka long ban ioh ban bteng biang ia ka kam VC shipor ha NEHU.
U Dr. Lakhon Kma president jong ka MeTTA, u la ong ba kane ka jingleh jong u VC ba shipor ka long ba u ia leh pyrshah ia ka hukum jong u President ka Ri India, namar ia u la thung kum u VC ba shipor ha dien ba la kut ka por um lah ban wanrah ka jingkylla ha ka Statue jong ka skul bah.
Ki dkhot jong kane ka Academic Council, ki kynthup ia ki Professor, nongmih khmat na u president, ka seng ki samla pule jong ka skul bah bad ki nonghikai bala rangbah bad na ka sorkar jylla, na ka liang jong ki lai seng ki kyntu ia ki to kiba don ha kane ka Academic Council ba kin pyrshah ban pynkylla ia ka Statue para 2(2a) jong ka NEHU.
U Prof. X.P Mao president jong ka NEHUTA, u la ong ban pynkylla ia ka para 2(2a) dei tang u VC ba pura, ka rule kala kren shai ba u VC ba shipor yn nym lah ban leh ia kane hynrei une u VC ba shipor mynta u la buh ha ka mat ia kren ha ka jingialang ban long online la shai ka sngi kaba long pyrshah ia ka Statue jong ka NEHU.
Na ka liang jong kine ki lai tylli ki seng kila kren shai ba lada la shai ka sngi ka Academic Council kan pdiang ia ka jingkwah jong u VC ba shipor, kum ki riew peitngor kin ujor sha u President ka Ri India, sha u Chancellor, sha ka UGC bad ha ka Executive Council ban pynthikna ba kim dei ban ai ia ka jingmynjur ia ka rai jong ka Academic Council ka ban long la shai ka sngi.
