Shillong, Jylliew 22: U Bah Jitendra Dkhar Director jong ka “Blind Lead Trust” ha ka sngi thohdieng kila ai Ejahar pyrshah ia ka trai iing kaba ki sah wai ha Lachummier, ha iing Ranee’s Abode Temple Road.
kane ka jingujor ia kane ka ejahar hapoh Laitumkhrah police station ka long halor ka jingshah shoh jong u nongkyrshan jong ki u Dr Theodore Moallen u ba dei na America u ba trei ha India. Ym tang kata une u nongkyrshah jong ki u la shah kem ha ki pulit halor ka jingkynnoh ba u la jrong kti, hynrei ka long ba u iada ki ha kapor ba ka trai iing ka wan ban hala tang namar ba u pump um na ka bynta jong ki.
U Bah Jitendra Director jong ka BLT, ong ba ka jingkynnoh ba jrong kti u Dr Moallen ia ka trai iing dei kaba bakla, hynrei dei ki trai iing kiba la wan ban pynklumar da kaba shoh bad dat ia u tei u nongkyrshah jong ki hapoh kamra ba ki sah.
La iathuh ruh ba kiba shah ha kane ka iing ki don lai ngut bad baroh lai ngut kidei kiba don ka jingduna ha ki dkhot met, kaba sngewsih tam ka long ba ha kane ba shah shoh u nongkyrshan jong ki, kila shah theh da ka jaka na khmat jong ki, ka ong u Bah Jitendra.
U Bah Jitendra u la ong ba kane ka trai iing kaba leh kumne ia ki ka dei ka magistrate, lada ia ki kaleh kumne kumno kan jia ia ki riew paidbah, u la ong ba na ka liang jong ki kin nym shong kli kti ha lor kane ka jingshah leh. La iahtuh ba kadaw jong ka jingjia baroh ka long ba ki ujor ba kim ioh um.
Halor kane ka jingjia, ki seng ba don jingduna ha ki dkhot met kila ai ka jingkyrshan ia ki ban ia leh pyrshah ia kine ki jingshah ban bein ka jong ki, kum ka AMABEDI jong ka Bethany Society Shillong bad kiwei kiwei de ki kynhun seng.
Ha kane ka sngi ka Kong Hasina Kharbih jong ka Impulse NGO Network, kala iathuh ba kum ka kynhun bad shimet ruh kila long ki nongskhi ia kane ka jingjia bad ka jingkynnoh ba u nongkyrshah jong ki u jrong kti kam dei kaba shisha, hynrei dei ki trai iing kiba la jrong kti bad pynsyier ia kine kiba don ka jingduna ha ki dkhot met.
Haba ia dei bad kane ka jingjia, la pyntip ruh sha u Arman Ali khlieh duh jong ka sorkar pdeng ba dei peit ia kiba don jingduna ha ki dkhot ha ka Ri India. Na ka liang jong ka BLT kan ujor ruh ia kane ka jingjia sha ka Commission for Disabilities ha ka sorkar jylla.
Ka Kong Agens Kharshiing kala ong ba ia kum kine ki jingjia yn nym lah ban pdiang ba kumno la thombor ia ki briew kiba don jingduna ha ki dkhotmet,na ka liang jong ka ruh ka ai ka jingkyrshah ia kine ki khynnah ba don ka jingduna ha ki dkhot met.
