Shillong, Naitung 23: Ka seng samla jong ka District Youth Congress jong ka North Garo Hills District kala ujor sha u Deputy Commissioner halor ka jingsah teng jong ka jingkieng iaid kali ha Soksan bad Chidaret kiba la sdang ban trei mynta la bun bun snem hynrei khlem pyndep.
Ha kane ka jingujor ka DYC kala ong ba ka jingkieng ha Soksan ka dei kaba la shah rah ha ka um naduh u snem 2014 bad kane ka jingkieng ka long kaba don kam bha ia ka North Garo Hills baroh kawei, ka sorkar ka mang pisa ban tei ia katei ka jingkieng ha u snem 2016 hynrei haduh mynta kane ka jingtrei ka dang sah khongreng.
Ha kane ka jingujor la ong ba ka Resubelpara ka dei ka pdeng jong ka North Garo Hills District ha kaba ki ophis ki don ha kane ka jaka bad ka iew ka dei tang ka Mendipathar bad ka jingkieng Soksan ka dei kaba pyniasoh ia kane ka surok bah hynrei kane ka jingtrei kala sah kumto haduh mynta.
Na ka liang jong ka DYC ka kyntu ia u DC jong ka North Garo Hills ban u hukum ban sdang noh ia kane ka jingtrei ban pyndep na ka bynta ka jingbit jingbiang ki paidbah. La kdew ruh ba ka jingkieng ha Dekachang kaba la ai ha u juh u kontraktor kala sah khlem trei.
Na ka liang jong u Barthiar Marak President DYC u la kyntu ia u DC ba un leit jurip hi da lade ia kine ki jingkieng ban lap ia ki jingshisha bad ban bthah ia u kontraktor ban sdang noh ia ka jingtrei nakar kala ktah ia ka leit ka wan ki paidbah ka North Garo Hills District baroh kawei.
