Shillong, Risaw 30: Ka Vasudha Gupta, ka Director General (News) NSD, AIR mynta ka sngi ka la wan jngoh ia ka nongbah jong ka jylla Meghalaya bad pynlong ka jingialang peit bniah bad ki ophisar jong ka AIR bad Doordarshan, Shillong.
Ka Director General kaba la wan jngoh shi sngi ia ka jylla ka la lum jingtip shaphang ka jinglah treikam ka AIR bad Doordarshan ha kaba iadei bad ki kam teknikal bad ki prokram.
Hadien ka jingialang, ka DG ka la ong ba ka kam ba kongsan jong ka AIR bad ka Doordarshan kum ki public broadcaster kalong ban pynsaphriang jingtip ba dei sha ki paidbah lyngba ki khubor jong ka, ki prokram ba iadei bad ka kolshor bad ki jingiamir jingmut kiba ai jingtip.
Ka la kyntu ruh ia ki nongtrei jong ka AIR bad Doordarshan Shillong ba kin iatreilang bad wanrah ia ki prokram kiba ai jingmyntoi ia ki briew jong ka jylla bad ki thain ba don marjan.
Ka Director General ka la leit jngoh kylleng ki jylla ka thain shatei lammihngi ha kine ki khyndiat sngi ba la leit ban lum jingtip shaphang ka jingtreikam jong ka Prasar Bharati bad ki kynhun jong ka ha ka thain. Hashuwa kane, ka la leit jngoh ia ka nongbah Aizawl, Agartala bad Guwahati.
