New Delhi, Iaiong 02: Ban ialeh pyrshah ia ka jingsaphriang jong ki jingtip bym don nongrim bad ruh ban bat ia ka burom jong ka kam jiednongmihkhmat, ka Election Commission of India (ECI) mynta ka sngi ka la pyllait paidbah ia ka ‘Myth vs Reality Register’ kum shi bynta jong ka elekshonLokSabha 2024 kaba dang iaidshakhmat mynta.
Ia kane la pyllait paidbah mynta ka sngi da u Chief Election Commissioner, Rajiv Kumar ha ryngkat ki Election Commissioner, Gyanesh Kumar bad Sukhbir Singh Sandhu ha NirvachanSadan, New Delhi.
Ka ‘Myth vs Reality Register’ ka dei kaba ki paidbah ki lah ban pyndonkam lyngba ka website jong ka Election Commission (https://mythvsreality.eci.gov.in/). Ka factual matrix jong ka Register ka dei ka ban pynthymmai man ka por ban pynbiang ia ki jingpynshai ba thymmai bad ki FAQ ba thymmai.
Ka jingwanrahia ka ‘Myth vs Reality Register’ ka long kum u mawmer ha ki kam jong ka ECI kiba dang iaidshakhmat ban iada ia ka kam jiednongmihkhmat na ki jingpynsaphriang ia ki jingtip bym don nongrim.
U Chief Election Commissioner, Rajiv Kumar ha ka jingiakren bad ki lad pathai khubor haba la pynbna ia ki tarik jong ka elekshon 2024 u la ong ba ka jingsaphriang ki khubor lamler ka dei kawei na ki jingeh ha ryngkat ka jingpyndonkam ia ka pisa, ka bor bad ka jingpynkhein ia ka MCC ha kaba iadei bad ka jingskhem jong ka kam jiednongmihkhmat.
Namar ka jingsaphriang jong ki khubor lamler bad ki jingbatai ba bakla ka la long ka jingeh kaba dang kham heh katba dang iaid ka por ha ki ri ba treikam ka synsharpaidbah ha kylleng ka pyrthei, kane ka sienjam jong ka ECI ka dei ka jingpyrshang ban pynthikna ba ki nongjiednongmihkhmat ki ioh ia ki jingtip ba la pynshisha bad kiba dei ha ka por ba jied ia ki nongmihkhmat.
Ka ‘Myth vs Reality Register’ ka long ka tyllong ba pura ban pynshai ia ki jingbakla bad ki khanalamler kiba saphriang ha ka por jiednongmihkhmat bad kane ka aibor ia ki nongjiednongmihkhmat ba kin shim ia ka rai da ka jingsngewthuh ia ki jingshisha.
La saindur ia kane ha ka rukom kaba suk ban pyndonkam ha kaba la bataishai shaphang ki jingsngewthuhbakla shaphang ki EVM/VVPAT, Electoral Roll/ ki jingai jingshakri ia ki nongjiednongmihkhmat, ka rukom pyniaid ia ka kam jiednongmihkhmat bad kiwei kiwei.
Kane ka register ka don ruh ia ki bynta kiba pyni ia ki jingpynshai ia ki jingsngewthuhbakla bad ki khanalamler, ki jingsngewthuhbakla kiba dang saphriang ha ki rynsan social media, ki FAQ halor ki phang kiba kongsan bad ki sakhi hapoh ki bynta bapher bapher na ka bynta baroh kiba iadon bynta ha kane ka kam. Yn pynthymmaiia ka register man ka por.
La kyntu ia baroh kiba iadon bynta ha kane ka kam ba kin pynshisha ia kanokano ka khana ba ki iohsngew na kanokano ka tyllong lyngba ka jingtip ba la pynbiang ha ka Myth vs. Reality register.
Lah ban pyndonkam ia kane ka rynsan ban pynshisha ia ki khana, iada na ka jingshaphriang jong ki khana ba ialam bakla, pynbeit ia ki jingartatien bad ioh jingtip shaphang ki kam kiba kongsan kiba iadei bad ka elekshon 2024. Ki briew ki lah ruh ban iasam jingtip lyngba ki rynsan social media bapher bapher lyngba kane ka register.
