Shillong, Jylliew 20: U Chief Executive Member jong ka Khasi Hills Autonomous District Council ( KHADC ) U Bah Pynshngainlang Syiem mynta ka sngi u la wanrah ia ka mang tyngka na ka bynta u snem 2017-2018 ha ka jingduna pisa kaba T.40,030/-.
Haba kren hapoh ka iing dorbar u CEM ula ong ba ka jing pynlut ha une u snem mang tyngka ka long T.201,59,30,220/- bad la antad ba ka jingmih kan long T.201,58,90,090/- . Ha kane ka mang tyngka na ka liang u CEM ula ai ka jingkular ba ka EC kan ialeh bad adkar ha ka rukom pynlut .
La iathuh hapoh ka iing dorbar ban a ka liang jong ka EC ka kwah ban pyntreikam noh ia ka bai bam tymmen jong ki MDC barim . Ka EC kala buh ia ka jingmang pisa ban siew ia ka bai bam jong ki ha u Naitung ban wan 2017 bad katto katne ka arrear ba kane ka pisa ka council ka khmih lynti kan wan na ka khajna jong ka marpoh khyndew .
Kumba la ia tip ba ka sorkar kala dep thung ia ka 5th pay commission na ka bynta ban siew thymmai ia ka tulop jong ki, kumta ruh na ka liang jong ka EC ka angnud eh ban pyntreikam ia ka tulop ba thymmai hapoh ka council .
Hadien ba la wanrah ia ka mang tyngka da u CEM hapoh ka iing dorbar na ka liang jong u chairman u Bah L.G Nongsiej ula btah ia ki dkhot jong ka iing dorbar ba lada don mano mano ba kwah ban iatai halor jong kane ki hap ban ai kyrteng ha ka office jong u secretary jong ka Legislative Committee.
