Shillong, Rymphang 21: U Myntri Rangbah ka jylla u Conrad K Sangma mynta ka sngi u la wanrah ia ka mang tyngka na ka bynta u snem 2024-2025 ia ka jingmang tyngka kaba duna T.2,029 klur kaba long 3.83% na ka jingmih jong ka jylla kabala tip kum ka GSDP.
Ha kane ka mang tyngka u myntri rangbah u la kdew ba ka sorkar kala mang ban pynlut ka long baroh ha kane ka snem mang tyngka 2024-2025 kan long T. 27,072/- klur tyngka, katba ka jingmih pat kaba ka jylla kan ioh haba la khein kan long baroh T.23,545/- klur tyngka.
Ha kane ka snem mang tyngka ka jingsiew ia ka ram kan long T. 1,236/- klur tyngka, ka bai bam tynmen ia kiba la shong thait na ka kam sorkar kan long T.1,865/- klur tyngka, kane ka long khlem da khein lang ia ka ram kaba kaba la mang T.3, 527/- klur tyngka.
U Myntri Rangbah ka jylla u la ong ba ka sorkar kala pynbiet ia ka rukom siew ia ka tulop jong ki 52,829 ngut ki nongtrei sokar, 35,403 kiba la shong thiat kiba ioh ia ka baibam tynmen, ki don 21,000 ngut kiba ioh tulop da kaba ai grant ka sorkar, 24.039 ngut ki nonghikai SSA, 28,540 ngut kiba trei sngi, 7051 ngut ki ASHA bad 12,324 ngut kiba trei ha ki Aganwadi.
Ban pynpoi ia ka jylla sha ka jingkiew ka ioh ka kot kaba 10 billion ka sorkar kala shim bun ki lat ki lynti da kaba wanrah ia ki skhim thymmai, bad u myntri rangbah ula buh ia ka thong ba ha kane ka snem mang tyngka 2024-2025 ka jingiohka jylla ka dei ban long T.52,973/-klur tyngka.
Ha kane ka snem mang tyngka 2024-2025 ka jingmih na ka jylla kan long T.4,041/- klur tyngka, na ka GST ka jingioh kan long T.1,995/-klur tyngka, ka jingioh na ki khajana haka khaii pateng kan long T.1,156/- klur tyngka bad ka khajna na ka kyiad kan long T.661 klur tyngka. Ka jingioh na ki byndei ki khajna kan long T.747/- klur tyngka.
U Myntri Rangbah ka jylla u la shim ia ki lat ki lynti ban kynjoh sha ka 10 billion ka ioh ka kot ha u snem 2028, la wan rah ia ki skhim thymmai halor ki 10 tylli ki mat kiba ka sorkar kan pyntrei ia kine ki skhim thymmai.
U Myntri Rangbah ka jylla u la kren shai ba ka sorkar kala shim ia ki lat ki lynti kumno ban khring ia ki riew shmet ban wanbei pisa sha kane ka jylla ban seng ia kikam ki jam bad ha kane ka jingkren u la kdew bad buh ia ka jingmang tyngka ha man ki kam.
