Shillong, Risaw 28: Ka KHNAM state youth wing ka la leit ban ia kynduh ia u secretary jong ka MeECL ha Lumjingshai ban wad jingtip halor ka appointment jong ki 772 ngut ki jugali ki ba la pass bad la mih kyrteng ha ka merit list kat kum ka notification ba la pynmih da ka MeECL haka 02 Aug 2016.
Ka jingleit kynduh jong ka seng ka long halor ka jingiohi ba kam pat don ka jing sam ia ki shithi thung kam haduh mynta kaba la buh ha ka jing lyngoh ia ka seng. Hadien ka jingia kynduh bad u secretary ngi la ioh ia ka jingpynshai ba ka jingslem ka long ba ka dang iaid ka police verification jong baroh ki ba la pass bad tang hadien ba la ioh ia ka police verification yn lah ban sam ia ki shithi thungkam.
La ioh ruh ia ka jingpynshai ba lada donkam ia ka validity jong ka list yn pynjlan shuh sa 3 bnai. Ka seng ka kyrpad ruh ia ka tnat pulit ban shim khia bad ban pynkloi ia kane ka kam ban pynurlong ia ka jingthrang jing ki ba bun, ki ba la ap shitom ban ioh ia kane ka kam naduh u snem 2012.
Ka seng ka kyntu ruh ia baroh ki ba la mih kyrteng ha ka merit list, naka bynta kane ka kam, ban leit mih sha ki police station ba ha jang iing jong ki ban pyndep kham kloi ia ka verification bad ban plie lad ia ka MeECL ban pyndep noh ia ka jingthung kam.
