Shillong, Jylliew 20: Wat la ka seng UDP bad ka HSPDP kila dep ban ai da ka jingthoh sha u nongialam jong ka PDF u Bah P N Syiem, hynrei ha kane ka sngi sdang jong ka dorbar mang tyngka kim pat ai ia ka No Confidence Motion.
Kane ka jing weng syndet jong ka UDP bad ka HSPDP na ka jingiatreilang bad ka PDF, kala wanrah pynban ia ka jingpra hapoh jong kitei ki party, ha kaba u Bah HS Shylla MDC jong ka Nongkrem na ka seng UDP u la leit ban kyrshan ia ka PDF bad kum juh u Bah B Warjri jong ka HSPDP ha kaba u la ai da ka jingthoh.
Na ka liang jong ka KHNAM kaba don u wei u MDC mynta, u Bah Adelbert Nongrum u la kren shai ba ia mynta yn nym kyrshan iano iano ruh un shong pdeng beit, lada don ka NCM pyrshah ia ka EC ruh yn nym vote ban kyrshan ne pyrsahah.
Kumba ka long mynta ka UDP don saw ngut ki MDC, u Bah Donkupar Sumer wat la um pat hiar shuki haduh mynta ka sngi kum u EM, mynta ka sngi hapoh iing dorbar u la leit ban shong sha ka liang pyrshah. U Bah B Warjri jong ka HSPDP u ba la ai ka jingkyrshan ia ka PDF ha kane ka sngi sdang jong ka iing dorbar um shym la poi sha iing dorbar.
