Shillong, Nailar 13: Ka seng Khasi Jaintia Welfare Association (KJWA) dang shem kala pynlong ia ka jingiakop thoh Ese ha ka ktien tynrai la jong na ka bynta ki khynnah skul bad kum juh ia kiba la pule ha ki college. Ha kane ka jingiakop baroh kiba la poi ban ia shim bynta ki long 240 ngut. Ia ka jingiakop la pynlong ha iing skul KJP Mawkhar.
Haka jingkren jong u Professor SS Majaw kum u kongsan ha kane ka sngi u la pynpaw ia ka jingsngewkmen ka jong u ban iohi ba bun na ki samla kila ia poi ban ia shim bynta ha kane ka jingiakop thoh Ese bad khamtam eh ha ka ktien la jong. Ha ka juh ka por u la pynpaw ia ka jingsngewsih ban iohi ba bun ki samla kane ka juk mynta ban kren ia ka ktien la jong ki thlun wat la ki kmie ki kpa ki dei ki kahsi.
La ong ba ka jingiabeh ban kren bad thoh tang ia ka ktien nongwei, ki klet noh pat ban thoh ia la ka jong ka ktien, kane ka dei ka daw bah ha kane ka pateng kaba mynta. Ha kane ka sngi u Prof Majaw u la ban jur ba ka sorkar ka dei ban pynrung noh ia ka ktien khasi ha k khyrngit kaba phra jong ka Riti Synshar jong ka Ri India.
Ia kane ka jingiakop thoh Ese ha kane ka sngi la plied a u Bah R P Kharshiing u ba dei u secretary jong ka Khasi Author Society. Ha ka jingkren u Bah Kharshiing u la batai ba lada ioh ban pynrung ia ka ktien khasi ha ka khyrngit kaba phra jong ka Riti synshar jong ka Ri India ki don bun bah ki jingmyntoi kiba kum ka jaidbynriew ka dei ban ioh.
Ki nongjop ha kane ka jingiakop thoh Ese na ka liang jong ki skul, ia ka kyrdan ba nyngkong la ioh da ka Phibansara M Rapsang klass XII na Synod Colelge, ba la wan ba ar dei ka Larisha Klass XII na ka Govt Girls HS School, ba la wan ba lai u dei u R. Reassureson L. Nonglait Klass XII na Synod College.
Haba ia dei bad ka khusnam kaba la thoh beit eh ha ka kramar ka dei ka Larisha Kharphuli, Klass XII na Synod College, ha kane ka sngi la sam ruh ia ka khusnam kum ka jingpynshlur ia ki nongwan ia shim bynta sha ka Ibanylla Suchiang, Bamedari Palei jong ka St. Mary’s HS School.
Ki nongjop na ka liang jong ki samla pule College, ia ka nam lah duh la ioh da ka Riehtngen Rympei jong ka St Mary’s College. Kardan ba ar la ioh da ka Ibakordor Nongbet, Shillong College, kyrdan balai la ioh da ka Rebecca Marwein St, Mary’s College. Ha ka kramar la ioh da ka Banlamlynti Mylliemngap na Shillong College. Ia ki khusnam sha ki nongjop yn sa ha ka 20 tarik mynta u bnai ha Khasi National Dorbar Hall.
