Shillong, Lber 23: Ka Meghalaya Judo Association (MJA) bad U Bah Teiborlang Pathaw, Commandant jong Ka North Eastern Security Academy, Mawlai Mawkynroh hajan NEHU Campus kin ia treilang ban pynkiew shaphrang shuh shuh ia ka jingialehkai martial arts judo na ka bynta kito ki private security ki ban shah hikai ha NESA shen ha kaba ka sorkar ka la mang haduh 300 ngut eiei.
Kane kan iarap shibun na ka bynta Ka MJA ha kaba kan lah ban pynmih shuh shuh ki judoka ki ban shim ia bynta khamtam ha ka senior level namar la shem ba duna than ki ban bteng na ka liang ki junior level sha ka senior namar kiba bun ki daw kaba long ha kaba ki hap ban pule kham shajrong lane haba ki la iohkam khamtam ha ki jaka trei kiba kham eh ban ioh por bad jngai ruh kumruh.
Ka long ruh ba ki ban shah hikai ha NESA ki dei kito kiba la kynjoh 18 snem shaneng. Kane ka jinghikai judo ha NESA kan iarap ia kito baroh kiba shah hikai ban kham nang ban iada ialade bad ia kiwei ruh namar ka judo ka long ka jingialehkai kaba la hikai kyrpang kumno ban ialeh pyrshah lada hap ban iada wat lada ymd on ki tiar ialeh kiba lah ban pynmynsaw.
Jijutsu, kaba kham eh bad kham ma ban ia ka judo, la ju hikai ia ki shipai bad ki kynhun nongiada ha kiba bun ki ri ka pyrthei. Da kane Ka MJA ka kyrmen ba yn lah ban sei ki judoka ban ia shim bynta ha ka senior level khambha ban ia kaba long mynta.
Ka long ruh kaba sngewtynnat vban tip ba shen yn sa sdang noh sa ka Computer Classes ha NESA ha kaba wat ki judoka bad ki nongdie kotkhubor ki lah ban wan shah hikai khlem da donkam ban siew pisa bad lada kuj kita sngewbha ban pyntip sha ka MJA bad Meghalaya Newspaper Hawker & Vendor Association.(SP News)
