Guwahati, Naiwieng 23: Hapoh ka jingkyrshan ka State Support Mission jong ka NITI Aayog, ka Women Entrepreneurship Platform (WEP)ka la pynkhreh ban pynlong ia ka workshop kaba ar ha ka jingiatreilang bad ka Sorkar Arunachal Pradesh.
Kane ka Workshop kan long ha DorjeeKhandu State Convention Center, Itanagar ha ka 24 tarik Naiwieng 2023 naduh ka por 9:30 mynstep. Ha kane ka workshop yn iadonlang ki longkmie kiba seng kam lajong kynthup ki SHG, ki cluster bad ki kynhun, ki nongialam na ka Sorkar bad ki nongmihkhmat na ki kam shimet.
Kane ka workshop kadei shi bynta jong ka jingsdangia ki jingialang jong kito kiba don bynta ha kane ka kam na ka bynta ban pynkhlain ia ki kam ba ialam da ki longkmie jong ka thain shateilammihngi.
Ka thong ba hakhmat eh kalong ban kyntiew ka jingai jingtip ba iadei bad ka WEP bad ka jingpyllaitia ki sienjam bapher bapher ba ka WEP ka la sdang. Kine ki sienjam ki kynthup ka prokram ‘Maitri’ jong ka MakeMy Trip ban pynkup bor ia ki longkmie kiba long ki trai jong ki homestay ha ka thain shateilammihngi, ka prokram jong ka AIC-SELCO bad ka WEP ban kyrshan ia ka jingseng kam lajong ha ki kam kiba iadei bad ka bording ka bym pynmih jaboh, bad kiwei kiwei ki jingiatreilang.
Ha kane ka workshop kan don ki jingiamir jingmut halor ki phang kum ka jingryntih kyrdan ki shynrang bad kynthei, ki kam ialehkai bad ka jingseng kam lajong, ki jingiatreilang ka Sorkar bad ki briew, ki kynhun shimet. Ka jingkyrshan na ki polisi, bad ka jingbud ia ki ain ki kyndon – katkum ki jinglong jingman ka thain shateilammihngi.
Ha kane ka workshop yn don ki nongkren ba pawkhmat kum u PemaKhandu, Myntri Rangbah jong ka Arunachal Pradesh, u Dharmendra, Chief Secretary, Sorkar Arunachal Pradesh, Dr.ChintanVaishnav, Mission Director jong ka Atal Innovation Mission ha ka NITI Aayog.
Ki delegate na ka Tnat DoNER, DPIIT, FICCI, NASSCOM, Indian Institute of Entrepreneurship, UNDP, Mastercard, IndusInd, PayTm, bad kiwei kiwei ki ban iashim bynta ha kane ka prokram.
Kane ka workshop kanplie lad ia ki longkmie kiba seng kam lajong ban ioh jingtip, ban iasam ia ki jingshem jong ki, ki jingai jingmut ba ka jingioh ia ki jingdon jingem bad ka jingkyrshan.
Shuh shuh, kan long ruh ka rynsan kaba biang ia ka Sorkar bad ki kynhun shimet ban pyni ia ka jingkut jingmut jong ki ban kyntiew ia ki longkmie kiba seng kam lajong ha ka thain shateilammihngi bad ban wanrah ia ki jinglong jingman ba kham plié lad ha ki jingseng kam lajong.
