Shillong , Rymphang 07: Ka Khasi Student Union (KSU) sengkmie mynta ha ka sien ka ba ar ka la ioh ban pynlong ia ka exam na ka bynta ban jied ia ki samla ki ban leit ban shah hikai pyntbit na ka bynta ban ia khun ia ka exam ‘Union Public Service Commission (UPSC) Civil service’ ha nongbah Delhi.
Ha ka jingiakren bad ki nongthoh khubor na ka liang u Assistance Secretary ka Education Cell u Bah Richest Malngiang u la ong ba na ka liang ka seng kan sa jied ia ki khynnah ki ba wan shakhmat ba kin ioh ban leit ban pyntbit ha Delhi na ka bynta kane ka exam. “ ki la don kumba 103 ngut ki khynnah ki ba la wan ban thoh ia kane ka Exam, ki ba kynthup ia ki basah ha Shillong bad na kiwei pat ki thaiñ nongkyndong” u la ong.
“ka seng kan jied beit tang ia ki khynnah ki ba wan sha khmat bad na ka liang ka seng kan sa peit haduh katno ngut kan ioh ban phah sha Delhi ha kane ka kynti ba mynta”.
“ka seng ka sa bishar bniah ha ka ba iadei bad ka jingpynlut na ka bynta kine ki samla, lada ki samla ki dei ki ba wan na ki long Ïing ki baduk na ka seng kan ai ka jingkyrshan ka ba shispah na ka shispah, hynrei lada ki samla ki dei ki ba na ki longÏing ki ba kham bit- kham biang na ka liang ka seng kan ia kren bad kine ki samla”
Ka seng ka la shim iakne ka sien jam kadei namar ba bunki samla ki thrang ban ia khun ia kane ka exam hynrei kim lah pat ban leit shah hikai pyntbit ha ki jaka ki ba kham biangkum ha nongbah Delhi namar ki jingjynjar ha Ïing ha sem.
Ka seng KSU ka la mih sha khmat ban shim ia kane ka sien jam ka ban long ka lad na ka bynta ki khun samla ba kin lah ban leit ban pyntbit shuh shuh ia ki jingthrang jong ki.
U bah Malngiang u la pynpaw ruh ba naduh u snem 2013 kim pat shym la don ki samla khasi ki ban pass ia ka exam jong ka UPSC Civil service, dei na kane ka daw ka ba la pynlong ia ka seng ba kan plie ia kane ka lad ia ki samla.
Ka KSU ha kine ki snem ba la lah ka la ioh ruh ban phah lain ngut ki samla na ka jylla ban leit ban shah pyntbit ha nongbah Delhi ha ka ban ia khun ia ka exam UPSC.
