Shillong, Lber 27: U Chief Executive member jong ka KHADC u Bah Ardent M Basaiawmoit haba jubab ia ka jingiakren halor ka mang tyngka kaba lai bnai hapoh jong ka iing dorbar ia kaba la wanrah da u bah Banteidor Lyngdoh na ka seng Congress, na ka liang jong u CEM u la ong ba un sa aida ka jingthoh sha u kontraktor ba shna ia ka iing dorbar kaba thymmai jong ka Council.
U bah Basaiawmoit u la ong ba un sa wad jingshai ha kaba ia dei bad kane ka kam namar kumba ka paw na ki jingthoh kiba don ha ophis kam long kaba shai bad ynsa khot ia u kontrator ha shuwa ban shim ia ka rai la ka dei ne em ban pynsangeh ia ka jingtrei.
Haba ia dei bad ka jingdawa jong u Bah Manstudy Nongrem u MDC jong ka Langrin ba ka KHADC ka dei ban buh ia ka ophis trei kam ha Mawkyrwat namar kila ioh mynta ia ka District kaba thymmai u CEM u la ong ba kin sa peit ia kane katkum ka jingdon jong ka pisa.
Kane ka juh ka jubab la ai ruh ha kaba ia dei bad ka jingdawa jong u Bah Banteidor Lyngdoh ha kaba ia dei bad ka jingmang pisa na ka bynta ki kam sport, u CEM u la ong ba ka shong ha ka jingdon pisa bad ka jingpynlait jong ka sorkar ia ka bhah ba ka KHADC ka dei ban ioh.
Ha kane ka sngi ka iing dorbar ka la pynlait ia ka mang tyngka kaba lai bnai khlem da don kano kano ka cutmotion na ka liang pyrshah.(SP News)
