Nongpoh Iaiong 01: Ka Khasi Students’ Union (KSU), North Khasi Hills district unit, kan pynlong ia ka jingiaid paidbah ha ka sngi kyrsiew jaidbynriew, ha Nongpoh, ha ka 4 tarik Iaiong, 2014, la ong u president u Samla Ferdynald K Kharkamni.
Kane ka jingiaid paidbah kan sdang na ophis ka seng na Mawdiangum bad kan kut ha MUDA complex ha sor Nongpoh bad ynda la poi ha katei ka jaka, kan don sa ka jingialang paidbah ban pynsngew sha ki paidbah ia ki mat jingdawa jong ka KSU kiba dang sahteng kiba ka sorkar jylla haduh kine ki sngi kam pat lah ban pynurlong, la ong utei u nongialam ki samla pule.
Kin don bun ngut ki nongkren ba kynthup na ka KSU, ki seng bhalang bad na kiwei ki riew rangbah bad ki longkmie kiba ka KSU ka la jied ia ki ban ai jingkren ha katei ka sngi, ha kaba ki mat iakren kin long, ka Inner Line Permit (ILP), ka jingrung kyrthep ki bar jylla (Influx), ka shongkha khleh, ki pud ki sam ka jylla (border issue), ka
pule puthi (education), bad kiwei kiwei ki mat.
Ia katei ka jingialang, yn pynlong ha ka por 2 baje nohphai sngi, tang mar ia wan na katei ka jingiaid paidbah, u la bynrap.
Ha kaba iadei bad kane, na ka liang utei u nongialam ka KSU na ka district u la khot bad wer lang ia ki paidbah ka district ban iasnoh kti lang ha katei ka sngi, ban iaid paidbah naduh katei ka jaka ba la buh bad ban don ruh ha ka jingialang kumba la pynbeit.(SP News)
