Shillong, Nailur 22: Ka ïing dorbar jong ka Khasi Hills Autonomous District Council ha ka sngi sdang ka dorbar kypang da kawei ka sur kila rai ban peitbniah biang ïa ka Khasi Hills Autonomous District ( Khasi Social Custom of Clan Administration) Bill, 2022 hadien ba la shah pynphai biang ha ka DCA.
Kane kala wan hadien ba u Deputy Chief Executive Member ka KHADC u bah Pynshngain N Syiem u la wanrah ïa ka report jong ka Executive Committee ha ka sngi ba sdang ka dorbar ba kyrpang ba ar sngi jong ka KHADC.
Hadien ba la wanrah ïa katei ka report, na ka liang u nongïalam ka liang pyrshah u Bah Titos Chyne u la ïeng ban pynpaw ka jingpyrshah halor katei ka report ba la wanrah da u Dy CEM.
“Ym lah ban pdiang ïa kane ka report namar ba ka lah long shabar jong ka jingpynïaid kam jong ka ïing dorbar” ong u bah Titos.
Shuh shuh u bah Titos u la pynpaw ba ka EC ka wanrah ïa ka report jong ka advisory committee bad kane kala pynhiar kyrdan ïa ka ïing dorbar bad u la kyntu ia ka EC ban weng noh ïa kane ka report namar lada pdiang kan pynhiar kyrdan ïa ka iing baroh kawei.
U bah Titos u la pyntip ba ha u snem 2018 la pass ia ka clan bill, hadien ba la ïoh abservation na u Lat ka jylla kumta u la kyntu ia ka EC ban wanrah ia ka report ha ka rukom kaba dei.
Haba kular ban ia trei lang bad ka Executive Committee u Bah Titos u la ong “Ïa tei ngin ïa tei beit tangba dei ban ïa tei da ka lynti kaba dei” u la ong.
Haba pynshai u Bah Pynshngain u la ong ba namar ba kadei ka nongkynti jong ka ïing dorbar kim nud satia ban leh stad than, kumta ki wanrah hapoh iing dorbar na ka bynta ban pule bniah.
Na ka liang u Bah Pyniaid u la ong ba hadien ba ka EC kala iohi ïa ka jingiatyngkhuh bad iohi ruh ba ki don ki jingkdew jong ka jingiatyngkhuh ki sa phah biang sha ka advisory Committee.
Hadien ka jingia pyni nia mar kylliang hapdeng ka liang pyrshah bad ka liang synshar la shim ia ka rai ban phai dien biang ia ka clan bill bad aiti ha EC ban thaw ia ka Committee bad ynda la dep kan phah pat sha u Lat ka jylla.
