New Delhi, U Myntri Kam Pohiing bad Cooperation jong ka sorkarpdeng, Amit Shah un plie paidbah ia ka rynsan BHARATPOL ba la shna da ka central Bureau of Investigation (CBI) ha New Delhi ha ka 7 tarik Kyllalyngkot, 2025 ha Bharat Mandapam ha Delhi.
Hapoh ka jingialam jong u Myntri Rangbah duh Narendra Modi, ka sorkarpdeng ka la shim ia ki sienjam ba bun ban pynkhlain ia ki kynhun ba pyntreikam ia ka ain jong ka ri.
Ka rynsan BHARATPOL kan pynsuk ia ki bor ba pyntreikam ia ka ain ha India ba kin iasam jingtip kham sted bad ioh jingiarap kham suk na ki kynhun pulit jong kiwei kiwei ki ri.
Ka CBI, kum ka National Central Bureau (NCB-New Delhi) na ka bynta ka INTERPOL ha India, ka pynsuk ka jingiatreilang bad ki ri ha kaba iadei bad ki kam beain ryngkat ka jingiatreilang bad ki kynhun bapher bapher ha kylleng ka ri, kynthup ki kynhun ba pyntreikam ia ka ain.
Ha ka kyrdan jong ka sorkarpdeng, sorkar Jylla bad Union Territory, ia kane ka jingiatreilang la pyntreikam lyngba ki INTERPOL Liaison Officer (ILO), kiba don bynta ruh bad ki Unit Officer (UO) ha ka kyrdan jong ki Superintendent of Police, Commissioner of Police bad ki khlieh duh jong ki Branch, hapoh ki kynhun jong ki. Mynta, ki jingiakren hapdeng ka CBI, ki ILO, bad ki UO ka long lyngba ki shithi, ki email bad ki fax.
Ka jingkiew ki kam beain ha ki ri bapher bapher ba kynthup ia ki kam cyber beain, ki kam beain kiba iadei bad ka pisa, ka jingpynshit lyngba ka internet, ki kynhun ba leh ia ki kam beain, ka jingshalanthok, ka jingdie ia ki briew bad kiwei kiwei ki kam ka donkam ia ka jingai jingiarap kaba sted ban jurip ia kine ki kam beain.
Ban weng ia kane ka jingeh, ka CBI ka la shna ia ka rynsan BHARATPOL, ba lah ban ioh lyngba ka website jong ka, ka ban wanrah ia baroh kito kiba don bynta ha kane ka kam ha kawei ka rynsan.
Ka rynsan BHARATPOL kan pyniaid beitiaidryntih ia ka kam jong baroh ki jingkyrpad na ka bynta ka jingioh jingiarap nabar ri lyngba ka INTERPOL, ba kynthup ia ka jingphah ia ki Red Notice bad kiwei kiwei ki notice jong ka INTERPOL.
Ka rynsan BHARATPOL kanlong ka atiar wanrah jingkylla ia ki ophisarpulit, kaba kyntiew ia ka jingseisoh jong ki haba ki ialeh pyrshah ia ki kam beain bad ki jingeh ba iadei bad ka jingshngain.
Lyngba ka jingsuk bad jingsted ban ioh jingiarap nabarri, kan pynkhlain ia ki sienjam jong ka India ban iakhun ia ki kam beain kiba jia ha ki ri bapher bapher.
U Myntri Kam Pohiing bad Cooperation jong ka sorkarpdeng, Amit Shah yn sam ruh ia ki Police Medal sha 35 ngut ki ophisar CBI kiba la ioh ia ka khusnam President’s Police Medals for Distinguished Service bad ka Union Home Minister’s Medal for Excellence in Investigation.
Ki Kynrem ki Lyndan bad ki ophisar na ki Tnad sorkarpdeng/Tnad ba kynthup ia ka Tnad External Affairs, Tnad Kam Pohiing jong ka sorkarpdeng, DoPT, Central Vigilance Commission bad ki Kynhun Pulit jong ka sorkarpdeng kin iadonlang ha kane ka jingialang.
