Shillong, Nohprah 07: Ka seng trei monsngewbha ka Grassroot kala trei bor bah ha kiba bun kine ki snem kiba la leit noh na ka bynta ban wanrah ia jingkylla ha ka imlang sah lang , la ka long ha ka liang ka koit ka khiah, ban kyntiew ia ka ioh ka kot sha ki jaka sor bad nongkyndong bad ban ia trei lang bad kiwei ki seng la ka long ha ka Ri India lane bad ki Ri kiba na shabar jong ka Ri India ruh kumjuh.
Kum ka seng kala juh iarap ia ki riew kynthei kiba la shah leh beijot sha ki riew sniew, kiba shah niom bein ha iing ha sem da kaba iarap ia ki ban ioh ia ki jingiarap lyngba jong ka ain katkum ka jingdon kam ka jong ki bad haduh mynta kila lah ban iarap haduh hynriew ngut ki kynthei naduh ba ki la seng ia kane ka kynhun ha u snem 2014 kane ka jingiarap ka long khamtam eh ha kaba ia dei bad ka ain.
Kum shibynta ha kane ka jingialeh ban wanrah ia kane ka jinglylla ka seng kan pynlong ia ka jingiatyrko ha ka 9 tarik mynta u bnai ha Dinam Hall ha ka por 10.30 baje mynstep haduh ka por shi baje noh phai sngi halor ka phang “Ban iathuh noh da ka ain ia ki kam Awria” bad ha ka shiphew tarik pat kim pynlong ia ka jingiakop pyniriam ia kaba la ai kyrteng “Gala Night” ia kane yn pynlong ha poh ka skul bah jong ka NEHU.
Ka Grassroot ka sngew ba ki kynthei nadih kip or hyndai la juh iew ia ki kum ki ba kham hapoh ban ia u rangbah, hynrei kane ka jingkylla jong ka por ki kynthei ruh kim dei shuh ban dang long ha kata ka kyrdan , dei na kane ka daw ba ia ki jingshah ban bein jong ki kynthei bun sien la shu buhrieh, kum ka jingshah leh beijot, ka jingshah ktah kti ka jingshah leh kynshlein bad kiba bun rukom.
Ka jingthmu jong ka Grassroot ban pynlong ia kane ka jingiakop Tyrko bad kane ka jingiakop pyniriam ka long ban pynmih pisa na ka bynta ban ia jingkyrshan ia kito ki kynthei kiba la shah leh beijot hynrei n aka daw jong ka jingduk ka jong ki kim lah ban siew ia ka bai muktiar bun sien ki sngap la sngap noh ia kaei kaba jia ia ki.
