Shillong, Nailar 12: Ka Nehru Yuva Kendra Sangathan, Meghalaya kan pynlong ia ka ‘Freedom India Run 2.0’ ban pyniaid da ki kynhun jong ki Samla ha kylleng ka jylla Meghalaya naduh ka 13 tarik Nailar, 2021.
Ia kane ka Freedom Run yn pynlong katkum kine ki tarik, ha ka 13.08.2021: South West Khasi Hills, West Khasi Hills bad West Garo Hills District, ha ka 14.08.2021: East Jaintia Hills, East Khasi Hills, East Garo Hills bad West Jaintia Hills District, ha ka 21.08.2021: North Garo Hills bad Ri Bhoi District bad ha ka 28.08.2021: South Garo Hills bad South West Garo Hills District
Ia ka ‘Fit India Freedom Run’ la sdang ha u snem ba ladep ha ka jingpur ka khlam COVID-19 haba ka jingpyniajngai iwei ia iwei ka la long ka rukom im kaba thymmai, khnang ban wanrah ia ka rukom im kaba koit ba khiah ryngkat ka jingbud ia ki kyndon jong ka jingpyniajngai.
La sdang ia ka Fit India Freedom Run halor ka nongrim ba ki briew ki ‘lah ban mareh na kano kano ka jaka, ha kano kano ka por! Phi lah ban mareh ha ka lynti kaba phi mon, ha ka por kaba phi lait. Kamut,phi lah ban mareh laka jong ka jingmareh thong bad ha ka por kaba phi mon.
Ia ka bynta ba nyngkong jong kane ka campaign la pynlong naduh ka 15 tarik Nailar haduh 2 tarik Risaw,2020. Palat 5 klur ki briew na ki Tnat Sorkar Pdeng bad ki Sorkar Jylla bad ki kynhun ba kynthup ia ka Nehru Yuva Kendra Sangathan, ki kynhun shipai Sorkar pdeng, ki kynhun trei mon sngewbha, ki kynhun shimet, ki skul, ki briew, ki Seng Samla ki la iashim bynta bad pyndep ia ka jingmareh ha ka jingjngai kumba 18 klur km.
Ha kane ka kynti ba mynta, ka Fit lndia Freedom Run 2.0 kan sdang ha ka 13 tarik Nailar, 2021 bad kan kut ha ka 2 tarik Risaw, 2021.Ka jingthmu kalong ban pynshlur ia ki briew ban sdang ia ki kam ba iadei bad ka koit ka khiah kum ka jingmareh bad ki kam ialehkai ha ka jingim jong ki ba manla ka sngi.
Ban lait na ka jingsngaid palat pud, ka jingjaituh, jingkhuslai jingmut, ki jingpang jingshitom bad kiwei kiwei. Lyngba kane ka campaign, yn kyntu ia ki nongshong shnong ban kut jingmut ban kynthup ia ki kam kilan met kumba 30 minit man ka sngi ha ka jingim jong ki ‘FITNESS KI DOSE AADHA GHANTA ROZ”.
Ia ki prokram ha kylleng ka ri yn plié lyngba ka bor internet da u Myntri ba dei peit ia ki kam ialehkai, u Anurag Singh Thakur bad u Myntri khynnah ba dei peit ia ki kam ialehkai, u Nisith Pramanik ha ka 13 tarik Nailar, 2021 ha kaba ki kynhun kum ka Nehru Yuva Kendra Sangathan.
Ki kynhun ki ban ia shnoh kti lang ki long ki, BSF, CISF, CRPF, Railways, NYKS, ITBP, NSG, SSB kin iasnohkti lang lyngba ka bor internet na ki jaka bapher bapher ha kylleng ka ri. Shuh shuh, kin don 75 tylli ki prokram kilan met ha ki jaka bapher bapher ha ka sngi plié kata ha ka 13 tarik Nailar, 2021.
Hadien kane, yn pynlong ia ki prokram man ka taiew ha 75 tylli ki distrik bad ha 75 tylli ki shnong ha man ki Distrik haduh ka 2 tarik Risaw 2021.Kumta, yn pynlong ia ka Fit India Freedom Run ha 744 tylli ki Distrik, 75 tylli ki shnong ha man ki 744 tylli ki distrik bad 30,000 tylli ki jaka pule ha kylleng ka ri. Lyngba kane ka sienjam, palat 7.5 klur ki samla bad ki nongshong shnong kin iashim bynta ha kane ka prokram mareh.
