Shillong, Kyllalyngkot 27: U Samla Boltijoy Ryan Nongsiej uba la jop ïa ka nam Mister India 2023 Tourism Global ha Sangli, Maharashtra ha u snem 2023 u la shah jied ban mihkhmat ïa ka ri India ha ka International Pageant ka ban sa long ha ka ri Vietnam ha u bnai Jyllliew, 2024.
Ha ka jingïakren bad ki lad pathai khubor ha ka sngi Palei u samla Boltijoy Ryan Nongsiej, ryngkat ka jingsynran lang jong ka kmie bad ka hynmen kynthei u la ïathuh ba ka jinglut jingsep na ka bynta ban leit ïashim bynta ha kane ka rynsan ïakob ka ban sa long ha ka Ri Vietnam ka long kaba bun kumta kum u samla uba wan na ka longïing longsem kaba duk bad kaba duna ka ïoh ka kot.
U la kyrpad ïa ka Sorkar Jylla, ïa ki kynhun bapher bapher bad ïa ki riewshimet kiba don ka mynsiem ïarap ba kin kyrshan lem ïa u na ka bynta kane ka jingthmu kaba bha khnang ban dup lah ban wanrah ïa ka nam ka burom ïa ka ri India, ïa ka Jylla Meghajaya bad ïa ka jaidbynriew hi baroh kawei.
Une u samla un long ruh uba nyngkong eh na kane ka Jylla Meghalaya ban mihkhmat ïa ka ri India shabar ri ha ka jingïakob Mister Tourism Global ha ka King and Queen of Mister and Miss International kaba la ïatreilang bad ka Global Model India.
Kum ban shu pyntip hangne ba une u samla mynta u dang pule ïa ka Master Degree ha ka Tourism and Travel Management ha Martin Luther Christian University, Shillong.
