Shillong, Nailar 29: Ka seng ki nonghikai Khasi Jaintia Deficit School Teacher’s Association (KJDSA) bad ka Garo Hills Deficit School Teacher’s Association kila leit ban ai ia ka dorkhas sha u myntri ba dei peit ia ka tnad pule puthi jong ka jylla u bah Lahkmen Rymbui halor ki jingeh kaba ki ia kynduh.
Kitei ki ar tylli ki seng jong ki nonghikai kiba dei na ki skul Deficit ha ka phang pdeng jong ka dorkhas kila kdew ba ia ka jingkular jong ka sorkar kaba la kular ha u snem 2019 ban pynkiew ia ka tulop jong ki da 75% haduh mynta kam pat treikam.
Na ka liang jong ki nonghikai kila kdew ruh ba ka sorkar haduh mynta kam pat pyntrei kam ia ka “Fifth Pay Commission” na ka bynta ki nonghikai skul ha ki skul deficit ha kane ka jylla Meghalaya.
Kiwei ki mat kiba ia dei bad ki nonghikai la kdew ba ka sorkar haduh mynta kam pat pyntrei kam ia ka bai bam tynmen jong ki nonghikai deficit, ka shuti por ba ioh khyllung, ban siew ia ka bai dawai katkum ka kaiphot jong ka FMPC.
Ha ka dorkhas kaba la ai sha u myntri ka tnad pule kila dawa ruh ba ka sorkar ka dei ban pynrung ia ki nonghikai skul deficit hapoh jong ka State Employees Groups Insurance Scheme, ka jingsiew ia ka tulop na ka bynta ki Vice Principal, ki Assistant Lecturer, ban ai jinghikai komputer kumba la kdew ha ka kaiphot jong ka FMPC.
Ha kane ka dorkhas kila kdew ruh ba ka sorkar haduh mynta kam pat lah ban thaw ia ki kyndon shakri kam na ka bynta ki nonghikai, la kyrpad ia ka sorkar ba ka dei ban pyntrei kam noh na ka bynta ka jingiaid beit iaid ryntih ha kaba ia dei bad ki skul deficit.
