Shillong, Nailur 04: U Director General jong ki pulit u Raghvendra Awasthi IPS, mynta ka sngi u la lum ia ka jingialang jong ki rangbah shnong ka sor Shillong, ki principal jong ki skul bad ki college jong kane ka nongbah Shillong ban ia mir jingmut kumno ban leh ban pynduna ia ka jingdheng kali ha kane ka nongbah Shillong.
Ha ka jingkren plie ia kane ka jingiamur jingmut u Raghvendra u la ong ba naduh ba un wan sha kane ka jylla Meghalaya ha u snem 1986 haduh ban da poi sha kane ka kam sa ban shong thiat ka jingdheng kali ka long kum juh haduh mynta.
U la ong ba u la khot kyrpang ia kane ka jingiamir jingmut ka long ban ia pynilem kumno ban leh da ka jingiatreilang jong baroh, ha kane ka kam u la ong b alai tylli ki mawbyrsiew, Education, Engineering bad Enforcement” ki lai tylli ki “E” bad ki pulit ki hap ba ha u “E” ba lai dei halor kane ba ki sa khot khnang ia kane ka jingiakynduh lang.
Ha kane ka jingiamir jingmut la don ba pynpaw ba ka daw jong ka jingdheng kali dei na ka jingkhlem bud ain jong ki draibar Taxi, kila don kiba pynpaw ba wat ki briew kiba la nang la stad ruh ki pynkhein ia ki ain wat kynnoh tang ia ki draibar taxi. Kiba bun na ki nongkren kila pynpaw ba ka jingpynkhein ia ain ka long da baroh kiba niah kali bad kane ka buh ia ki pulit ha ka jingeh.
Ha kane ka jingialang baroh ki nongkren kila pynpaw ba ka tnad pyniaid kali ka duna palat ki nongtrei ha baroh ki pulit station, ka tnad pulit kala dei ban pynshuh shuh ia ki nongtrei namar haba don ki pulit ka jingdheng kali ka kham duna.
Ha kane ka jingiakren, la pynwan dur ha ki ar bynta, kaba dei ban leh noh bad ia kaei kaba ka sorkar ka dei ban leh. Ki nongkren kila pynpaw ba ki skul bad ki College khamtam kiba sha ki thain Laitunkhrah ki dei ban don ia ki skul Bus ban kit ia ki samla pule bad kane ka pynduna ia ka jingbun ki kali ha surok.
Kila don kiba pynsngew ba ka sorkar ka dei ban shna bad pynba ia ki surok kiba dei na ruh jong ka sor Shillong khnang ba ki kali kin kiar na kaba rung sha Sor Shillong, la pynsngew ruh ha kane ka jingiamir jingmut ba lada lah ban pyniasoh iaka surok na Lad Umsaw ha Umiam sha ki thain Hynniewmer ba ki kali kiba mut leit sha Sohra kin nym kiew sha sor Shillong.
Mynta ka sngi kila don ruh kiba la pynpaw ba lada ka sorkar kam leh ei ei kane ka jingialang kam shu long tang kum kawei na ki jingialang haki por kiba la leit noh, ki shukut tang ha ki jingialang. Katba ka jingsah kut kali kala dang jur ha kane ka nongbah Shillong. La pynsgew ba lada ka sorkar kan tei ia ki ophis thymmai kam dei shuh ban tei ha kane ka sor Shillong hynrei ka dei ban tei noh sha New Shillong.
Haba pynkut ia ka jingiamur jingmut na ka liang jong u DGP u la ong ba la khot khang ia kane ka jingialang namar ki bor kiba halor duh ki kwah ban leh ei ei bad khlem map iano iano ruh kiba pynkhein iaki rule yn pynshitom katkum ka ain.
