Shillong, Nailur 02: ka don ka jingong bun sien ia kaba ha jan ymjuh iohi, ia peit ia kaba sha jngai, kane kala jia ia ka Iew Shillong ha Laitumkhrah, ka mala kaba sha poh jong kane ka iew ka plie man ka sngi, katba ia ka mala ba ar jong kane ka iew la khang tala da ki bun bun snem.
Haba U SP News Agency u la leit sha kane ka iew ban peit la ka dei ne em ka jingshisha ba ka mala kaba ar jong kane ka iew ka khangtala mynta la bun bun snem kumba la kynnoh, ha kane ka jingleit la shem ba ka dei ka jingshisha ba ka khangtala ia ka mala kaba ar.
Haba iakren bad kiba shong iew ha kane ka iew Shillong, ha Laitumkhrah, kiba bun kila pynsngew ba ka long shisha ka jingduh kaba khraw ba ia ka mala kaba ar jong kane ka iew naduh ba la dep ban shna ia ka khlem pyndon kam. Kan long ka jingmyntoi ym tang ia ka sorkar hynrei ia ki ba dei ban ioh dukan lada plie noh ia ka mala kaba ar.
Kiba bun kila ong ba ki dei tang ki nongshong iew kim tip balei ba khang ia ka mala kaba ar khlem da pyndon kam ia ka naduh ba la tei ia ka haduh mynta la shu khangtala, kala long ka jingduh nong kaba khraw ia ka sorkar kaba la pynlut shibun ka pisa ban shna ia kane ka iew.
Kumba ka long mynta kane ka mala kaba ar jong kane ka iew ha Laitumkhrah kala kylla long ka jaka sah miet jong ki briew kiba ym lah ban tip namar ka khangtala na khmat jongka khynrdop katba na sha dien ka don ka lynti ban kiew ia kaba khlem khang tala.
