Shillong, Naiwieng 12: Ban pynsngewthuh ia ki paidbah ha kaba ia dei bad ka jingmang niangkulia ka Shillong Endurance Motorsports Club (SEMC) kan pynlong ia ka jingiapynmareh kali lai sngi lynter ha Umtngar bad kane kan long ka sien kaba lai kaba ka seng kala pynlong da ka jingiatreilang bad ka Meghalaya Aids Control Society.
Haba kren ha ki lad pathiakhubor mynta ka sngi ha Shillong Press Club, u bah Vicky V Kharkongor general secretary jong ka seng u la ong ba kane ka jingpynmareh kali kan sdang ha ka 14 bad kan kut ha ka 16 tarik mynta u bnai.
U bah W Alexander na ka liang jong ka MACS, u la ong ba ha katei ka sngi kan don ka ICDC khnang ban ailad ia ki briew kiba kwah ban tip ia lade la ki don ne kim don ia u niangkulia, lada ki don ruh ki lah ban sumar bad lada kim don ruh kin husiar kane kan long kum ka jingpynsngewthuh ia ki paidbah.
La iathuh ba ha kane ka jylla Meghalaya na ki 31 lak ngut ki nongshong shnong kiba la phah peit bniah ia lade ki don ar lak ngut bad na kine la shem ba 4458 ngut kiba don ia une u niangkulia bad kiba bun kila ioh ia ka jingsumar.
Kumba ka long mynta ban ia kren ia u niangkulia ha kane ka jylla Meghalaya ki briew ki dang lehrian dei na kane ka daw ba ia ki briew kiba phah peit bniah ia lade ia ka kyrteng jong ki la buh rieh bad khlem da ka jingbit jong ki ym lah ban iathuh ia ka kyrteng.
