New Delhi, Iaiong 15: U Myntri Rangbah duh jong ka ri, u Narendra Modi, ha ka jingkren jong u sha ki briew ong ka ri ha ka 14 tarik u Iaiong, 2020 u la pyntip ba ia ka jingpakhang shn
ong ha kylleng ka ri yn bteng haduh ka 3 tarik u Jymmang, 2020 khnang ban tehlakam ia ka jingpur jong ka jingpang COVID-19 ha ka ri.
U Myntri Rangbah duh jong ka ri u la pynbna ruh ba yn shah ia katto katne ki kam ba kin bteng biang naduh ka 20 tarik Iaiong ha ki katto katne ki jaka jong ka ri.
Kum ka jingbuddien ia kane ka jingpynbna da u Myntri Rangbah duh jong ka ri, ka tnat Kam Poh Iing ka la pyllait ia ka hukum ha ka 14 tarik u Iaiong ban pyntip shaphang ka jingbteng ia ka jingpakhang shnong ha ka ri India haduh ka 3 tarik u Jymmang, 2020.
Shuh shuh, ka tnat ka la pyllait sa ia kawei ka hukum ha ka 15 tarik u Iaiong, 2020 ban shah ia katto katne ki kam ha ki jaka bym shym la ithuh kum ki containment zone da ki jylla, ki UT bad ki bor distrik.
Ryngkat bad ka hukum ba la pyllait ha ka 15 tarik u Iaiong, 2020 la pyllait ruh ia ki jingbthah kiba la kdew ia ki kam ba dang khang shuwa ha ka ri baroh kawei, ki kam ba shah ban pyntreikam ha ki containment zone bad katto katne ki kam kiba la shah ban bteng biang naduh ka 20 tarik u Iaiong, 2020 ha kiwei pat ki bynta jong ka ri.
Ka jingthmu jong kine ki jingbthah ba la pynkylla ka dei ban sngewthuh ia ki jingmyntoi ba mih mynta na ka bynta kaba nyngkong jong ka jingpakhang shnong bad ruh ban pynsuki shuh shuh ia ka jingpur jong ka jingpang COVID-19 bad ha kajuh ka por ban ai jingiarap ia ki nongrep, ki nongtrei bad ki nongbylla sngi.
Ki kam ba la pynsangeh ha kylleng ka ri ki kynthup ka jingleit shane shatai lyngba ki liengsuin, ki rel bad ki kali; ka jingpynlong ia ki skul bad kiwei kiwei ki jaka pule; ki kam karkhana bad jaka die tiar; ki kam jong ki hotel bad kiwei kiwei ki jaka sah briew; ki cinema hall; ki shopping complex; ki theatre bad kiwei kiwei; ki jingialang bapher bapher; ki jaka mane bapher bapher bad ki jingialang niam.
Ki don katto katne ki jingbthah sha kylleng ka ri kum ka jingdonkam ban pyndonkam ia ki mask ba shna hi ha ki jaka trei bad ki jaka paidbah, ki sienjam ban pynthikna ka jingkhuid kum ka jingpynbiang ia ki dawai sait kti sanitizer, ka jingphiah ia ki sngi trei, ka thermal scanning bad ka jingdain kuna ia kito kiba biah kulmar bad ia kito kiba iaid lait na kine ki jingbthah.
Ia ki kam ba shah ban bteng biang naduh ka 20 tarik u Iaiong katkum ki jingpynkylla ia ki jingbthah kin ym treikam ha ki containmet zone kumba la ithuh da ki jylla, ki UT bad ki bor distrik katkum ka jingbtah jong ka Tnat ka Koit ka Khiah jong ka Sorkar Pdeng.
La mana ban rung ban mih ki briew na kine ki containment zone lait na ki kam ba iadei bad ka jingpynbiang ia ki jingdonkam ba kongsan kum ki kam ba iadei bad ka jingsumar nongpang bad ka jingpeit ia ka shongsuk shongsain ryngkat ki kam ba iadei bad ka jingiaid beit ki kam sorkar.
Yn pyrkhing bha ia ki kam ba iadei bad ka jingtehlakam ia ka jingpur jong ka jingpang COVID-19 ha ki distrik ba kynrei bha bad ba la iohi ka jingpur stet ka jingpang. La pyllait ruh ia ki jingbthah halor ka jingithuh ia ki containment zone bad ki kam ban tehlakam ia ka jingpur jong ka jingpang.
Yn shah tang ia ka jingpynpoi ia ki tiar ba kongsan ha kine ki zone ban yn don ka jingteh kaba pyrkhing bha ia ka jingleit shane shatai bad ka jingmih, jingrung ha kine ki zone.
Ia ki kam ba la shah ban bteng biang naduh ka 20 tarik u Iaiong la thmu ban pynthikna ka jingiaid beit ki kam ba iadei bad ka rep ka riang, ba ka ioh ka kot ha ki jaka nongkyndong ki long kiba iaid beit, ba kin don ki lad kamai jakpoh ia ki nongbylla sngi bad kiwei kiwei ki nongtrei, ba katto katne ki kam karkhana ki nang iai bteng ha ryngkat ki jingiada kiba biang bad ka jingbat ia ki Standard Operating Protocol (SOP) bad ka jingpyndonkam ia ki rukom siew digital.
Ha kajuh ka por, da kaba kynmaw ia ka jingdonkam ban tehlakam ia ka jingpur jong ka jingpang COVID-19, la wanrah ia ki National Directive ban ialeh pyrshah ia ka COVID-19 ban pyntreikam da ki District Magistrate lyngba ki jingdain kuna bad ki jingpynshitom katkum ki kyndon ka Disaster Management Act, 2005.
Yn shah ba ka jingpynpoi tiar khlem da kdew lada kine ki tiar ki long kiba kongsan ne em. La shah ban trei ia ki kam ba iadei bad ka rep ka riang kaba kynthup ia ka jingthied ia ki mar rep lyngba ki mandi ba la ithuh bad ka direct, decentralized marketing, ka jingshna, jingpynpoi bad jingdie ia ki sboh, ki dawai rep bad ki symbai.
ki kam ba iadei bad ki jingri dohkha ha ki pung bad ki duriaw, ki kam ri jingri ba kynthup ia ki kam ba iadei bad ka dud, ki jingshna na ka dud, ki syiar bad kiwei kiwei ki jingri, ki jaka rep slasha, coffee bad ki dieng jri.
Ban iarap ia ka ioh ka kot ha ki jaka nongkyndong, la shah ban trei ia ki karkhana kiba pyntrei ha ki jaka nongkyndong kiba kynthup ia ki kam ba iadei bad ki mar bam, ka jingshna surok, ki kam pynpoi um sha ki jaka rep, ka jingshna ia ki jingtei building bad ki karkhana ha ki jaka nongkyndong.
Ki kam hapoh ka MNREGA, khamtam kito kiba iadei bad ka jingpynpoi um sha ki jaka rep bad ka jingtyngkai ia ka um, bad ki kam jong ki Common Service Centre (CSC). Kine kin plie lad ia ki briew ha ki jaka nongkyndong bad ki nongbylla ba kin kamai jakpoh.
Ia ki jaka shna tiar bad ki karkhana kiba don access control la shah ban treikam ha ki SEZ, EoU, ki industrial estate bad ki industrial township hadien ka jingpyntreikam ia ka SOP ba iadei bad ka jingpynjngai iwei na iwei.
La shah ruh ban trei ia ki kam ba iadei bad ka jingshna ia ki tiar IT, ki mar ba kongsan bad ki jingsong ia ki mar. La shah ruh ia ki kam ba iadei bad ka jingpynmih dewiong, ki mar poh khyndew bad ka umphniang.
La khmih lynti ba ki karkhana bad ki jaka pynmih tiar kin khie im biang lyngba kine ki sienjam bad kin plie lad kamai jakpoh hapdeng ka jingbat ia ki jingbthah halor ka jingshngain bad ka jing pynjngai iwei na iwei.
Ha kajuh ka por, ki bynta ba kongsan ha ki kam pisa kum ka RBI, ki bank, ki ATM, ki iew pisa kumba la ithuh da ka SEBI bad ki kompani insurance kin trei beit khnang ban iaid beit ki kam ha ki karkhana.
Ka rukom siew digital ka long kaba kongsan ha ki kam ba iadei bad ki kam bapher bapher bad ka long ruh kaba donkam ha ka jingkiew jong ka ri. Kumta, ki kam e-commerce, ki kam IT, ki data bad call centre, ki kam ai jinghikai lyngba ka internet kin iaid beit.
Ki jingpynkylla ha ki jingbthah ki shah ruh ia ki kam sumar briew ba kin iaid beit, ki kam ban pynbiang ia ki jingdonkam ka imlang sahlang kin iaid khlem jingthut, ka jingpynpoi ia ki mar ba kongsan ruh kin iaid beit.
Kumjuh, ki ophis ba kongsan jong ka Sorar Pdeng bad ki Sorkar Jylla, ki nongsynshar shnong kin plie beit ryngkat ka jingleit trei ki nongtrei ha kine ki ophis katkum ka jingdonkam.
Ha kaba peit kyllum, ki jingpynkylla ia ki jingbthah ki thew sha ka jingiaid beit ki kam ha kito ki bynta jong ka ioh ka kot kiba long kongsan na ka liang ka roi ka par ha ki jaka nongkyndong bad ki kam rep bad ban plie lad kamai jakpoh ha ryngkat ka jingbat ia ki kyndon ha ki jaka ba ka jingshngain ka long kaba kongsan ban tehlakam ia ka jingpur ka jingpang COVID-19 ha ka ri.
Ka don ka jingiakren hapdeng u Cabinet Secretary bad ki Chief Secretary bad ki DGP jong ki jylla halor ka jingpyntreikam ia kine ki jingbthah ba la pyllait mynta ka step. U Principal Secretary jong u Myntri Rangbah duh jong ka ri, u Home Secretary bad u Health Secretary Sorkar Pdeng ki la ia don ryngkat.
Baroh ki Collector, ki SP, ki municipal commissioner bad ki civil surgeon ruh ki ia shim bynta ha kane ka conference.
