Shillong, Naiwieng 05: U Chief Ececutive Member jong 
ka KHADC, u Bah HS Shylla mynta ka sngi u la buh ka jingkylli sha baroh ki seng bhalang kiba ia don bynta ha ka jingdawa ban pyntrei kam ia ka Inner Line Permit hapoh ka jylla Meghalaya , u la buh ka jingkylli hato “Ki lah ka ILP ne ka MRSS Act 2016”.
Haba kren ha ki lad pathai khubor na ka liang jong u Bah HS Shylla u la ong b, ba jingkhot jong ka Sorkar MDA ia ki Seng Bhalang sha ka miej jingiakren halor ka jingpyntreikam ia ka Meghalaya Residents Safety and Security Act, 2016 (MRSS Act, 2016) ha ka 15 tarik November, 2018, hadien ba na ka KHADC ka la phah ia ka KHAD (As Adapted from the Bengal Eastern Frontier Regulation, 1873) Regulation, 2018 ha ka 31 tarik Risaw , 2018.
U bah Shykka u la ong “ka la pynshitom jingmut ia nga haduh katta katta namar ba ka jingpang kaba la khum la syngit ia ka Jylla Meghalaya ka dei na ka Inter-State Influx (ka jingtuid ki Nong India na kiwei pat ki Jylla) bad ruh na ki Bar-ri (foreigners). Ka kham suk ban ialeh ia ki Bar-ri (foreigners) namar ka ain pyrshah ia ki ka la don bad ka long kaba khlain kumba ka la jia ia u MP barim ka Bangladesh uba la shah kem, shah set phatok namar la ioh kem ia u ba u don ha Shillong; hynrei kaba shitom khait ka dei ia u para-nong-India. Namarkata, ngi dei ban ia nujor bniah bha da kano ka Ain ngin pdiang ban long ka jingiada bashisha ia ngi, kata, la kan bha da ka Inner Line Permit (ILP)lane da ka MRSS Act, 20l6”?
U CEM jong ka KHADC, haba sot na ka jingiakren hapoh Parliament, Ka jingthmu kaba shai kdar jong ka ILP la iathuh da u Union Home Minister ka Sorkar Pdeng ha Parliament (Rajya Sabha) ha ka 27 tarik Rumphang, 2013 mynba u jubab ia kane ka jingkylli ba la leit rah da uwei u MP ka Rajya Sabha, u Sabil Ali halor ka jingkhang ia ki Nong India ban leit rung ha ki Jylla ba la pynjari ia ka ILP. ka jubab kaba shai kdar ka “Ka jingthmu bakongsan jong ka ILP ka long ban iada ia ka jingwan-buhai-shnong jong kiwei pat ki Nong-India ha ki Jylla ba la pyntreikaim ia ka ILP ban long ka jingiada ia ka jingdon briew ki Trai-ri ne ki Riewlum.”
U Bah Shylla u ong, Ki kyndon jong ka MRSS Act, 2016 ki long markhongpong pynban ia ka ILP bad ia ka jingdon kam ba kyrkieh jong ka Jylla ka “section 17 (1) (d) bad (3) to ka ong ‘Ban pdiang ia ki nongwan jnoghkai pyrthei, lane ia kiba wan jngoh ia kane ka jylla khlem da don kano kano ka jingpynwit, ki jaka ba khmih ia ka rung ka mih jong ki briew dei ban pynthikna ba kamd ei ban don ka jingpynwit ban khang ia ka hok jong ki kaba la don hapoh ka riti synsahr jong ka Ri India.
Na ka liang jong u CEM ka KHADC u la ong ba,Ka kyntien “Facilitate” baroh ngi tip ba ka mut “Pynsuk” bad kumta “Facilitation Centre” ka mut “Ki Jaka Pynsuk” ia ki tourist, ki visitors ryngkat bad ka jingmaham kaba tyngeh bha (strong warning) ia kine “Ki Jaka Pynsuk” ne “Facilitation Centre” – “..no Indian shall be put to inconvenience or restraint….” Ki “tourist” bad ki“visitors” ki kynthup lang ia ki Nong-India bad ki Foreigner (Bar-ri).
U CEM jong ka KHADC u kubur, ka dei ka jingshisha ba ka riti synsahr jong ka Ri India da ka Article 19 (1) (d) kam shah ban pynwit ia ka leit ka wan ne ka shong ka sah jong uno uno u Nong-India hapoh kano kano ka bynta jong ka Ri India, hynrei da kaba shai kdar kane ka kyndon jong ka Article 19 (1) (d) ka shah pynduh bor noh ynda poi ha ka Article 19 (5) kaba shah ia ka Jylla (State) ban buh ia ki kyndon kiba don jingmut kum ka jingpyrkhing ia ka leit ka wan bad ka shong sah ban long ka jingiada ia ki Scheduled Tribe.
U CEM u la ong ba na ka bynta kane dei ban sngewthuh ba ka kyntien State (Jylla) ka kynthup ruh ia ki Local Authority kum ka Municipal Board bad ruh khamtam ia ki Autonomous District Council, kata, kumba la thoh ha ka Article 12 ka Constitution ka India.
Ka paw shai kdar ba ki MLA baroh kiba don kti ha kaba thaw ia ka MRSS Act, 2016 kim niew shuh ba ka Meghalaya ka dei ka Jylla jong ki Schedule Tribe namar kim kdew shuh ia ka Article 19 (5) hynrei ki kdew beit tang ia ka Article 19 (1) (d) ba ki sa buh ia ka sub-Section (3) ha ka section 17 jong ka MRSS Act, 2016.
U Bah Shylla u la ong ba ki paidbah ki dei ban pan jingkhein na kito ki MLA baroh kiba la don kti ha kaba thaw ia ka MRSS Act, 20l6. Nga kyrmen skhem ba ki MLA Badonburom baroh bad ia ki Party baroh kiba don mynta ha ka Sorkar MDA kin iohi ia ka jingma jong ka MRSS Act, 2016.
U CEM jong ka KHADC, u pynshai ba ka KHADC ka don ka bor ban pynjari bad pyntreikam ia ka Bengal Eastern Frontier Regulation, 1873 thik kumba ka la pynjari bad pyntreikam ia ka India Christian Marriage Act, 1872. La pynskhem ia kane da ka rai jong ka iing bishar ba ha khklieh duh jong ka Ri India ha u snem 1971 ha ka Mokotduma ka Kong Byrhien Kurkalang na Mylliem Rngi bam kwai ha dwar u blei, halor ka jingpynjari bad jingpyntreikam ia ka Eastern Bengal and Assam Excise Act, 1910.
Kine ki Ain kiba bun na-ki, ki dei ki ki ain jong ka sorkar pdeng ba la thaw naduh ka por ka Sorkar Phareng ha India ia kiba la kynthup ia ki ha kawei ka Schedule ne kawei ka Thup bad pyndait ia ka da u Governor ka Assam, u Jairamdas Doulatram, ha ka United Khasi-Jaintia Hills District (Application of Laws) Regulation , 1952 ha ka 22 tarik April, 1952 bad tang ha ka 3 tarik May, 1952 la ioh ia ka jingmynjur jong u President ka Ri India, u Rajendra Prasad.
Ka iing bisahr ba ha khlieh duh jong ka Ri India ka da kren shai kdar ba kane ka Regulation, 1952 ba la thaw da u Governor ka bteng kum kiwei pat ki ain ba la thaw lymda la pyndam noh da ka lynti jong ka ain.
Ka bor ba u Governor u ioh ban thaw ia katei ka Regulation, 1952 ka dei na ka clause (b) jong ka sub-paragraph (1) bad sub-paragraph (3) jong ka Paragraph 19 jong ka Sixth Schedule ka Constitution ka India ha ka “(1) (b) u Lat u lah ban pynbeit na ka bynta ka shong suk shong sain na ka bynta kano kano ka jaka bad lada don ka jingpykylla dei ban leh da kaba wan rah ia ka jingpynkylla hapoh Parliament, lane da ka iing dorbar thawain jong ka jylla iaki ain kiba pyntrei kam, hynrei ia baroh ki ain kiba la shna na ka bynta ba kin trei kam ha kito ki jaka hapoh ka klos (b) jong ka bynta (1) hap ban phah sha u President, katba u president um pat ai ia ka jingmynjur kin nym trei kam.
Kane ka bor ba u Governor u don ka kut noh ha ka khyllipmat ba la jied ia ki MDC bad shimti ia ka UKJHADC ha u June 1952 hynrei ka Regulation ba u la thaw ka bteng ia ka jingtrei kam jong ka kumba long kiwei pat ki ain, kata, kumba la rai da ka Supreme Court ha ka mokotduma I Kong Byrhien Kurkalang.
Na ka liang jong u Bah Shylla u la ong ba u khmih lynti ba ka JHADC ruh kan ym pynslem ban thaw ia ka ain ban pyntreikam ia ka ILP kumba ngi la leh ha KHADC. Ka GHADC kan kham slem eh khyndiat tangba ka lynti ka don.
Na ka RTI ba la pan da uwei u Rangbah Khasi halor ka jingpyntrei kam ia ka “Bengal Eastern Frontier Regulation Act, 1873 ha jylla ne Distrik lane ha ki bynta jong ka Ri India, hato don kam ban ioh ia ka jingmynjur jong ka sorkar pdeng, ka jubab kaba la ioh ka long kaba shaikdar , ym don kam.
U CEM jong ka KHADC u la ong ba ka Sorkar Jylla kam lah shuh ban dang ong eiei halor ka Khasi Hills Autonomous District (As adapted from the Bengal Eastern Frontier Regulation, 1873) Regulation, 2018 namar ngi pynstet ban thaw ia kane ka Bill halor ka jingbthah ka Sorkar Jylla katkum ka shithi NO.DCA.47/2016/118 dt. 19th Iaiong, 2017 ba la soi da u Under Secretary, District Council Affairs Department.
U bah Shylla u ong, ki Seng Bhalang haba kin leit ha ka 15.11.2018 ka dei ia ki ban dawa ia ka jingpynkloi ban ai jingmynjur ia ka Khasi Hills Autonomous District (As adapted from the Bengal Eastern Frontier Regulation, 1873) Regulation, 2018 ym ban mynjur ia ka MRSS Act, 2016.
