Shillong, Naitung 15: Mynta ka sngi ka seng ki nonghikai SSA ha ka lama jong ka All Meghalaya SSA School Teachers Association (AMSSASTA) kila sdang ia ka jingiakhih shong kyllain mungor ha jaka ieng kali ha jan additional secretariat namar ba kim shym la ioh ia ka tulop ka jong ki mynta la hynriew bnai.
Ha kane ka sngi kila don ki nongkren ha jingialang paidbah ha jaka ieng kali ha Additional Secretariat bad kila rah ia ki jingthoh ban dawa na ka sorkar ba ka dei ban siew noh ia kane ka tulop ka jong ki kaba la sah san bnai bad kane kala ktah ia ka iing ka sem ka jong ki.
U bah Last Marngar President jong ka AMSSATSA la ong ba ka jingbit kaba ki ioh na ka bynta ka ne ka jingiakhih ki long tang haduh saw baje noh phai sngi kum ki nonghikai kin burom ia ka jingbthah jong ka sorkar ia mynta kin sangeh noh shuwa ia ka jingiakhih.
La iathuh ba ka jingsangeh noh ia kane ka jingiakhih shipor ka long namar ba ka Chief Secretary kala khot ia ka jingialang la sngi nyngkong ban ia kren ia kane, halor kane ka jingkhot ka seng ka burom bad kin ap ia ka jingmih na ka jigniakren ban long ha ka 18thNaitung 2022 la sngi nyngkong.
La ong ba ka jingdawa jong ki mynta ka long ba ki dei ban ioh ia ka tulop baroh san bnai, kin nym pdiang shuh ia kata ka jigntyrwa ar bnai, lada ka sorkar kam lah ban ai ia ka tulop baroh san bnai kim ban se ban bteng ia ka jingiakhih jong ki ban dawa ia ka tulop. Ka AMSSASTA ka dawa ruh ba ka sorkar ka dei ban siew noh ia ka pisa kaba sah ka jong ki nonghikai kaba la tip kum ka Arrear.
